ԵՐԵՎԱՆ, 14 փետրվարի – Sputnik. Ադրբեջանը վերջին տարիներին փորձել է միջազգային կառույցներում «խցկել» Ալմա Աթայի հռչակագիրը Հայաստանի հետ բանակցությունների և Լեռնային Ղարաբաղի հակամարտության կարգավորման համատեքստում, սակայն այդ փորձերը միշտ հանդիպել են հայկական դիվանագիտության արդյունավետ հակազդեցությանը։ Այս մասին «Ֆեյսբուքի» իր էջում գրել է Հայաստանի Հանրապետական կուսակցության փոխնախագահ Արմեն Աշոտյանը։
Նա հրապարակել է 2008թ. դեկտեմբերի 29-ին ՄԱԿ-ում Ադրբեջանի մշտական ներկայացուցիչ Աղշին Մեհդիևի, ՄԱԿ-ի գլխավոր ասամբլեայի օրակարգի շրջանակներում սառեցված հակամարտությունների վերաբերյալ քննարկման կապակցությամբ նամակը, որով խնդրում է ադրբեջանական հիմնավորումները «Ադրբեջանի տարածքային ամբողջականության մասին» դիտարկել և շրջանառել որպես ՄԱԿ գլխավոր ասամբլեայի փաստաթուղթ:
Աշոտյանի խոսքով` հայկական կողմը արդյունավետ և բովանդակալից կերպով ձախողել է Ադրբեջանի ջանքերը, և այդ փաստարկը երբեք չի դիտարկվել որպես հակամարտության կարգավորման սկզբունք։
Աշոտյանն ընդգծել է, որ Հայաստանի գործող իշխանությունը այս հռչակագիրը դրել են շրջանառության մեջ՝ չնայած բոլոր զգուշացումներին ու կոչերին։ Այսպիսով, ըստ Աշոտյանի, Նիկոլ Փաշինյանը իր ձեռքով իրականացրել է Ադրբեջանի երազանքը։
Հիշեցնենք` ՀՀ վարչապետը հոկտեմբերի 6-ին Պրահայում մասնակցել է Եվրոպական քաղաքական համայնքի գագաթնաժողովին, քառակողմ հանդիպում ունեցել Ֆրանսիայի նախագահ Էմանուել Մակրոնի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի մասնակցությամբ, մասնակցել է Էրդողան–Ալիև ոչ ֆորմալ հանդիպմանը, առանձնազրույց ունեցել Թուրքիայի նախագահ Էրդողանի հետ։ Քառակողմ հանդիպման ժամանակ Հայաստանն ու Ադրբեջանը հաստատել են իրենց հանձնառությունը ՄԱԿ-ի կանոնադրությանը և 1991թ. Ալմա Աթայի հռչակագրին, որոնց միջոցով երկու կողմերն էլ ճանաչում են միմյանց տարածքային ամբողջականությունն ու ինքնիշխանությունը: