ԵՐԵՎԱՆ, 8 փետրվարի – Sputnik. Սիրիայում ավերիչ երկրաշարժի պատճառով շուրջ 300 հազար մարդ ստիպված են եղել լքել իրենց տները։ Ինչպես տեղեկացնում է ՌԻԱ Նովոստին, այս տվյալը հայտնել է Սիրիայի մունիցիպալ կառավարման նախարար և արտակարգ օգնության հարցերի բարձրագույն կոմիտեի ղեկավար Հուսեյն Մահլյուֆը։
«Երկրաշարժի պատճառով 298 829 մարդ է փախել տներից», – ասել է նա։
Հիշեցնենք, որ փետրվարի 6–ին` ժամը 05.17–ին, Թուրքիայի Ղահրամանմարաշ գավառում երկրաշարժ է տեղի ունեցել, որն ավերածությունների է հանգեցրել մի շարք քաղաքներում։ Երևանի ժամանակով 14։24-ին և 14։36-ին ևս 2 ուժգին երկրաշարժ է գրանցվել։ Էպիկենտրոնային գոտում ստորգետնյա ցնցման ուժգնությունը կազմել է 10-11 բալ:
Թուրքիայի նախագահ Ռեջեփ Թայիփ Էրդողանը 3 ամսով արտակարգ դրություն Է հայտարարել երկրաշարժից տուժած նահանգներում։
Թուրքիայի նախագահ Ռեջեփ Թայիփ Էրդողանը հայտարարել է, որ երկրաշարժի զոհերի թիվը հասել է 8,5 հազարի, տուժել է 49 133 մարդ։
Սիրայի առողջապահության նախարարությունն էլ հայտնում է, որ զոհվել է 1250 մարդ, ավելի քան 2000 վիրավոր կա։