ԵՐԵՎԱՆ, 8 փետրվարի – Sputnik. Ատոմային Էներգիայի միջազգային գործակալությունը Իրանի միջուկային ծրագրի մասին տեղեկատվությունը փոխանցում է Գործողությունների համապարփակ ծրագրի վերսկսման շուրջ բանակցությունների հակառակորդներին: Տեղեկությունը ՌԻԱ Նովոստին հայտնել է Իրանի ատոմային Էներգիայի կազմակերպության ղեկավար Մոհամեդ Էսլամին։
«Մենք պետք է մեր ափսոսանքը հայտնենք քաղաքականացված և ոչ պրոֆեսիոնալ վարքագծի (ՄԱԳԱՏԷ-ի կողմից․խմբ․) հաճախակի դարձած դեպքերի վերաբերյալ, ինչպես նաև ԳՀՀԾ-ի շուրջ բանակցությունների մասին կարևոր տեղեկատվության փոխանցման կապակցությամբ», - ասել է Էսլամին:
Իրանի միջուկային ծրագրի շուրջ Գործողությունների համատեղ համապարփակ ծրագիրն ընդունվել է 2015 թվականին Չինաստանի, Ֆրանսիայի, Գերմանիայի, Ռուսաստանի, Մեծ Բրիտանիայի, ԱՄՆ-ի, ԵՄ-ի և Իրանի մասնակցությամբ երկարատև բանակցությունների արդյունքում: Սակայն 2018-ի մայիսին ԱՄՆ վարչակազմը հայտարարեց, որ դուրս է գալիս գործարքից։ Անցյալ տարվա նոյեմբերին Վիեննայում սկսվեցին Իրանի միջուկային ծրագրի և ԳՀՀԾ–ի վերականգնման շուրջ բանակցությունները։
2021 թվականի դեկտեմբերին կողմերը համաձայնության եկան համաձայնագրի երկու նախագծի շուրջ, որոնցում եվրոպական կողմը ներառել էր նաև Իրանի դիրքորոշումները։
Իրանի ներկայացուցիչ Բաղերի Քանին հայտարարեց, որ բանակցությունները հաջող են ընթանում, սակայն ԱՄՆ պետդեպարտամենտի ներկայացուցիչ Նեդ Փրայսը Վիեննայում գրանցված առաջընթացը համեստ որակեց՝ Թեհրանին կոչ անելով խնդրին լուրջ վերաբերվել: Կողմերի՝ իրենց մայրաքաղաքներ վերադառնալուց հետո մարտի վերջին բանակցությունները դադարեցվեցին։ Իրանի ԱԳՆ-ն դրանում մեղադրում է ամերիկյան վարչակազմին։ ԳՀՀԾ-ի շուրջ բանակցությունների վերջին փուլը տեղի է ունեցել հունիսի 29-30-ը Կատարի մայրաքաղաք Դոհայում: