ԵՐԵՎԱՆ, 8 փետրվարի – Sputnik. 2022 թվականին Հայաստանում արդյունաբերական արտադրանքի ծավալն աճել է7,9%-ով։ Տեղեկությունը հայտնում է Հայաստանի ազգային վիճակագրական կոմիտեն։ Աճը հիմնականում պայմանավորված է եղել ոչ թե հանքերի արդյունահանմամբ (ինչն այս անգամ նվազել է), ինչպես նախորդ տարիներին, այլ արտահանվող պահածոների արտադրությամբ, ինչպես նաև շինարարությունը սպասարկող ճյուղերով։
Մասնավորապես մետաղական հանքերում արդյունահանումը կրճատվել է 4,7 տոկոսով` հիմնականում նախորդ տարվա կեսերին պղնձի և մոլիբդենի գների անկման պատճառով։ Եթե 2021թ.-ի մեծ մասի ընթացքում Լոնդոնի բորսայում պղնձի մեկ տոննան արժեր ավելի քան 9 հազար դոլար, ապա 2022-կեսերից գինը նվազեց մինչև 7000-7500 (այդ թվում` Չինաստանի ձեռնարկություններում կորոնավիրուսային սահմանափակումների նոր ալիքի պատճառով):
Արդյունաբերական արտադրանքի ծավալը Հայաստանում 2022-ին
© Sputnik / Shushanik Avdalyan
Միայն 2022 թվականի նոյեմբերից գինը սկսեց վերականգնվել` հասնելով 9-9,5 հազարի, իսկ այժմ գտնվում է մոտ 9 հազարի սահմանում։ Գների նույնատիպ դինամիկա նկատվեց նաև մոլիբդենի դեպքում։ Բայց դրա արդյունահանումն ու վերամշակումը չկրճատվեցին նաև այն պատճառով, որ վերականգնվեցին և աճեցին մոլիբդենի խտանյութը ֆերոմոլիբդենի վերամշակելու ծավալները (ավելի քան 25 տոկոսով):
Արդյունաբերական արտադրանքի ծավալը Հայաստանում 2022-ին
© Sputnik / Shushanik Avdalyan
Մյուս կողմից աճեցին շինարարության հետ կապված արդյունաբերությունները։ Ավելի քան 10%-ով աճել է տուֆի, 18%-ով`ավազի ու ցեմենտի, գրեթե 40%-ով` գիպսի և ալաբաստրի (օգտագործվում է շինարարական խառնուրդներում) արդյունահանումն ու մշակումը։
Նշենք, որ թեև հանրապետություն ավելացել է ցեմենտի ներմուծումը, սակայն շուկայում գերակշռում է տեղական արտադրությունը (տարվա արդյունքներով`մոտ մեկ միլիոն տոննա` 180 հազար տոննա ներմուծման դիմաց)։ Ճիշտ է` տեղական ցեմենտի աճող մասը արտադրվում է ներմուծված կլինկերից (բայց թե ինչ ծավալներով, վիճակագրությունը չի արտացոլում)։ Աճել է նաև մետալուրգիական արտադրանքի և մետաղական արտադրանքի արտադրությունը` համապատասխանաբար 15%-ով և գրեթե 40%-ով։
Աճը մասամբ պայմանավորված է ֆերոմոլիբդենի արտադրությամբ, որը Հայաստանի շինարարության ոլորտի հետ կապված չէ (արտահանվում է արտերկիր), բայց մասամբ նաև ամրանների և մետաղական կոնստրուկցիաների թողարկմամբ, որոնք օգտագործվում են շինարարության մեջ։ Պատրաստի սննդամթերքի (այսինքն` չհաշված թարմ մրգերն ու բանջարեղենը) արտադրությունն աճել է7%-ով, բայց դրա հետ մեկտեղ դրանց արտահանումն աճել է գրեթե 70%-ով ՝ հասնելով մոտ 130 մլն դոլարի: Պահածոների արտահանումն աճել է գրեթե երկու անգամ` հասնելով 78 մլն դոլարի։