ԵՐԵՎԱՆ, 7 փետրվարի – Sputnik. ԱԺ–ում մեկնարկել է հերթական քառօրյան։ Այսօր պետք է քննարկվի «Հայաստան» խմբակցության պատգամավորներ Սեյրան Օհանյանի և Արմեն Չարչյանի նկատմամբ հանրային քրեական հետապնդում հարուցելու մասին ՀՀ գլխավոր դատախազ Աննա Վարդապետյանի միջնորդությունները։
Աննա Վարդապետյանն այս պահին ԱԺ–ում է։
ԱԺ նախագահ Ալեն Սիմոնյանը հայտնեց` ԱԺ պատգամավորների ընդհանուր թվի առնվազն 1/5–ը պաշտոնական գրությամբ առաջարկել է «Հայաստան» խմբակցության պատգամավոր Սեյրան Օհանյանի նկատմամբ քրեական հետապնդում հարուցելու մասին գլխավոր դատախազի գաղտնի դրոշմագրով միջնորդագրի քննարկումը փակ նիստով անցկացնել։ ԱԺ–ն կողմ քվեարկեց, որպեսզի այդ մասով փակ նիստ անցկացվի։
Այս պահին ԱԺ–ում բաց նիստով քննարկվում են Սեյրան Օհանյանի նկատմամբ քրեական հետապնդում հարուցելու դատախազի մյուս միջնորդությունները։
Ավելի վաղ տեղեկացրել էինք, որ ՀՀ գլխավոր դատախազ Աննա Վարդապետյանը ՀՀ պաշտպանության նախկին նախարար Սեյրան Օհանյանին նկատմամբ քրեական հետապնդում հարուցելուն համաձայնություն տալու մասին երեք միջնորդագիր է ներկայացրել ԱԺ նախագահ Ալեն Սիմոնյանին։
Վարդապետյանը նաև «Հայաստան» խմբակցության պատգամավոր Արմեն Չարչյանի նկատմամբ քրեական հետապնդում հարուցելուն համաձայնություն տալու մասին միջնորդություն է ներկայացրել ԱԺ նախագահին։