ԵՐԵՎԱՆ, 6 փետրվարի – Sputnik. Հայտնի են Թուրքիայում տեղի ունեցած երկրաշարժի հետևանքով մահացած ազգությամբ հայ քաղաքացիների անունները: Ստամբուլի «Ժամանակ» օրաթերթի խմբագիր Արա Գոչունյանը Sputnik Արմենիայի հետ զրույցում հայտնեց, որ երկրաշարժի զոհ են դարձել ամուսիններ Սամի Թաբաշը և Աիդա Թաբաշը:
Գոչունյանը նաև տեղեկացրեց, որ նրանց զավակները ծանր վիրավոր են:
Հիշեցնենք, որ առավոտյան ժամը 05.17–ին Թուրքիայի Ղահրամանմարաշ գավառում երկրաշարժ է տեղի ունեցել, որն ավերածությունների է հանգեցրել մի շարք քաղաքներում։ Թուրքական իշխանությունները հայտնել են 912 զոհի ու 5385 վիրավորի մասին։ Բացի այդ, Սիրիայի մի քանի շրջաններում նույնպես ավերածություններ են եղել, որոնք ավելի քան 300 մարդու կյանք են խլել, տուժել են 639-ը։ Ցնցումները զգացվել են նաև Լիբանանի մայրաքաղաք Բեյրութում։
Երկրաշարժի հետևանքով Սիրիայի Հալեպ քաղաքում 4 հայ է զոհվել` մայր ու որդի, ևս 2 հայ էլ` ամուսիններ, մահացել են Թուրքիայի Մալաթիա քաղաքում։
Հավելենք, որ այսօր` Երևանի ժամանակով 14։24-ին և 14։36-ին, Թուրքիայում ևս 2 ուժգին երկրաշարժ է գրանցվել։