ԵՐԵՎԱՆ, 6 փետրվարի – Sputnik. Թուրքիայում և Սիրիայում տեղի ունեցած երկրաշարժը շատ ավելի ուժգին էր, քան 1988 թ.–ին Հայաստանի Սպիտակ քաղաքում տեղի ունեցած երկրաշարժը։ ՌԻԱ Նովոստիի հետ զրույցում տեղեկությունը հայտնել է Ռուսաստանի գիտությունների ակադեմիայի երկրաշարժերի կանխատեսման տեսության և մաթեմատիկական երկրաֆիզիկայի ինստիտուտի տնօրեն Պյոտր Շեբալինը:
Նրա խոսքով` Հայաստանում տեղի ունեցած երկրաշարժի հետևանքով լուրջ ավերածություններ տեղի ունեցան, քանի որ շենքերը սեյսմակայուն չէին։
«Հին շինությունները նախատեսված չէին նման ուժգնության երկրաշարժի համար, այդ պատճառով Սպիտակում նման ավերածություններ եղան։ Բայց այսօր Թուրքիայում և Սիրիայում տեղի ունեցած երկրաշարժն ավելի ուժգին էր, քան Սպիտակինը», - ասել է Շեբալինը:
Հիշեցնենք, որ առավոտյան ժամը 05.17–ին Թուրքիայի Ղահրամանմարաշ գավառում երկրաշարժ է տեղի ունեցել, որն ավերածությունների է հանգեցրել մի շարք քաղաքներում։ Թուրքական իշխանությունները հայտնել են 912 զոհի ու 5385 վիրավորի մասին։ Բացի այդ, Սիրիայի մի քանի շրջաններում նույնպես ավերածություններ են եղել, որոնք ավելի քան 300 մարդու կյանք են խլել, տուժել են 639-ը։ Ցնցումները զգացվել են նաև Լիբանանի մայրաքաղաք Բեյրութում։
Երկրաշարժի հետևանքով Սիրիայի Հալեպ քաղաքում 4 հայ է զոհվել` մայր ու որդի, ևս 2 հայ էլ` ամուսիններ, մահացել են Թուրքիայի Մալաթիա քաղաքում։
Հավելենք, որ այսօր` Երևանի ժամանակով 14։24-ին և 14։36-ին, Թուրքիայում ևս 2 ուժգին երկրաշարժ է գրանցվել։