ԵՐԵՎԱՆ, 6 փետրվարի – Sputnik. Թբիլիսիի քաղաքային դատարանի դատավոր Գեորգի Արևաձեն այսօր մերժել է Վրաստանի նախկին նախագահ Միխեիլ Սաակաշվիլու պատժի հետաձգումը և ազատ արձակումը նրա առողջական վիճակի պատճառով` քաղաքական գործչին թողնելով կալանքի տակ։ Տեղեկությունը հայտնում է ՌԻԱ Նովոստին:
Դատավորի որոշումը հարուցել է Սաակաշվիլիի` դահլիճում ներկա, ինչպես նաև դատարանի բակում հավաքված կողմնակիցների դժգոհությունը։
Քաղաքական գործչի փաստաբանները Սաակաշվիլիին ազատ արձակելու միջնորդություն էին ներկայացրել Վրաստանի քրեական դատավարության օրենսգրքի 284-րդ հոդվածի համաձայն, ըստ որի` դատարանն իրավունք ունի դատապարտյալին ազատել պատիժը կրելուց, եթե նրա առողջական վիճակն անհամատեղելի է պատժի իրականացման հետ, ինչպես նաև եթե դատապարտյալի առողջացում կամ առողջական վիճակի զգալի բարելավում չի սպասվում:
Պաշտպանական կողմը միջնորդություն էր ներկայացրել որպես այլընտրանք հետաձգել պատժի կրումը։ 283-րդ հոդվածի համաձայն` դատապարտյալի պատիժը կարող է հետաձգվել դատաբժշկական փորձաքննության եզրակացության հիման վրա, եթե դատապարտյալը պատժի կրմանը խանգարող ծանր հիվանդություն ունի։
Սաակաշվիլիի ընտանիքի անդամներն ամեն օր հայտնում են քաղաքական գործչի ծանր վիճակի մասին։
Սաակաշվիլիի ընտանիքի անդամներն ամեն օր հայտնում են քաղաքական գործչի ծանր վիճակի մասին։
Հիշեցնենք` Վրաստանի նախկին նախագահ Միխեիլ Սաակաշվիլին, որը նախկինում Ուկրաինայում մի շարք առանցքային պաշտոններ է զբաղեցրել, այժմ կալանքի տակ է գտնվում հայրենիքում: Նա Վրաստան էր վերադարձել 2021 թվականի սեպտեմբերին և անմիջապես ձերբակալվել։
Նրան 6 տարվա ազատազրկման են դատապարտել բանկիրի սպանության և պատգամավորին ծեծի ենթարկելու գործով։ Քաղաքական գործչին մեղադրում են նաև սահմանն ապօրինի հատելու, պետական միջոցները մսխելու և 2007 թվականին ընդդիմության ցույցը ցրելու մեջ։