Ֆուտբոլ ու բոչիա. Երևանում մարզատոն էր հաշմանդամություն ունեցողների համար

Հաշմանդամություն ունեցող անձինք պետք է հնարավորություն ունենան սպորտով զբաղվելու, առողջ ապրելակերպ վարելու։ Այս նպատակով այսօր հենաշարժողական խնդիրներ ունեցող երեխաների` Երևանի թիվ 17 հատուկ դպրոցում «Լիարժեք կյանք» ՀԿ–ն սպորտային միջոցառում էր կազմակերպել. «օրակարգում» կույր ֆուտբոլն էր, բոչիան և անվասայլակներով բասկետբոլը։

Հավաքվել էին 60 մասնակիցներ, այդ թվում՝ հենաշարժողական խնդիրներ չունեցող երեխաներ։

Բացման խոսքով հանդես եկավ «Դեպի ներառական Հայաստան» ծրագրի ղեկավար Գայանե Գրիգորյանը։

Նա ընդգծեց, որ Հայաստանում առկա են ադապտիվ սպորտաձևեր, որոնցից շատերը ներառված չեն պարօլիմպիկ մարզաձևերում։

«Լիարժեք կյանք» ՀԿ նախագահ Սուրեն Մաղաքյանն էլ իր հերթին նշեց, որ սպորտը լավագույն հարթակն է անձի ֆիզիկական ներուժը բացահայտելու, օգտագործելու համար։

«Սա նաև շատ լավ հարթակ է ներառական միջավայր ստեղծելու համար։ Այսօր հաշմանդամություն ունեցող անձանց հետ ուժերը կչափեն նաև հաշմանդամություն չունեցող անձինք։ Միայն թե բոլորի համար կանոնները նույնն են։ Եթե մենք խոսում ենք կույր ֆուտբոլից, ուրեմն բոլոր մասնակիցների աչքերը պետք է կապված լինեն (բացի դարպասապահներից – խմբ.), կամ եթե անվասայլակով բասկետբոլից, ապա բոլորը պետք է լինեն անվասայլակի վրա»,–ասաց նա։

Միջոցառումը բաղկացած էր երկու մասից։ Առաջին մասում մասնակիցները ծանոթացան խաղերի կանոններին և ցուցադրական խաղ ներկայացրին, իսկ արդեն երկրորդ փուլում թիմերի բաժանվեցին և սկսեցին մրցել։

Կույր ֆուտբոլի հավաքականի գլխավոր մարզիչ Արփինե Արզումանյան մասնակիցներին ներկայացրեց խաղի կանոնները։ Այդ ընթացքում զրուցեցինք Ներառական իրավական բարեփոխումների կոալիցիայի անդամ և հաղորդակցության համակարգող Սիփան Ասատրյանի հետ, որը ևս այսօր իր ուժերն էր փորձում կույր ֆուտբոլում։

«Լինելով կույր, նման միջոցառումների բազմիցս մասնակցել եմ ավելի երիտասարդ տարիքում։ Տարբեր սպորտաձևերով ժամանակին զբաղվել եմ, այդ թվում` լեռնադահուկային սպորտով։ Ուրախ եմ, որ այսօր իրականացվում է այս միջոցառումը , որտեղ ես առաջին անգամ խաղալու եմ նույն ֆուտբոլը` ադապտացված կույրերի համար»,–ասում է Սիփանն ու միանում թիմակիցներին։

Այս ընթացքում մյուս մարզադահլիճում մասնակիցներին բոչիայի (գնդակախաղի տեսակ – խմբ.) կանոնները բացատրում է մարզիչ Աշոտ Շահինյանը։

Բոչիայի մասնակիցներից 10–ամյա Դանիել Գրիգորյանը շատ ոգևորված է։ Նա խաղին սիրահարվել է դեռ նախորդ տարի` ճամբարում։

«Խաղի կանոնները գիտեմ, էլի եմ խաղացել ու շատ եմ սիրում այն։ Շատ կուզեի, որ այս տարի էլ մեզ համար ամառային ճամբար անցկացվի, և ես էլ մասնակցելու հնարավորություն ունենամ»,–ասում է Դանիելը։

Կույր ֆուտբոլից հետո մարզադահլիճը տրամադրվեց անվասայլակով բասկետբոլի սիրահարներին։ Բոլորը գոհ էին ու տպավորված։

Միջոցառման ավարտին լավագույն թիմերն ու մարզիկները պարգևատրվեցին։