Չենք կարող ՌԴ-ից պահանջել մեր իշխանությունից հայամետ լինել. Թևանյանը` Լավրովի ասածի մասին

ԵՐԵՎԱՆ, 3 փետրվարի – Sputnik. Մենք չենք կարող այլ պետություններին, այդ թվում մեր դաշնակիցներից պահանջել լինել ավելի հայամետ, քան ՀՀ իշխանությունն է։ ԱԺ–ում «Հայաստան» խմբակցության կազմակերպած Լաչինի թեմայով լսումների ժամանակ ասաց խմբակցության պատգամավոր Անդրանիկ Թևանյանը` անդրադառնալով ՌԴ ԱԳ նախարար Սերգեյ Լավրովի երեկ կատարած հայտարարությանը։

ՌԴ արտգործնախարար Սերգեյ Լավրովը «Ռոսիա 24»–ին և ՌԻԱ Նովոստիին տված հարցազրույցում ասել էր` Հայաստանը բռնազավթել էր Ադրբեջանի շրջակա 7 շրջանները, և Ադրբեջանը վերադարձրեց իրեն պատկանող հողերը։

Նա նշեց, որ Պրահայում կայացած հանդիպումից հետո ֆունդամենտալ կերպով փոխվել է ԼՂ հետ կապված տրամաբանությունը, Լաչինի միջանցք հասկացողությունը վերացվել է, ինչն էլ ֆիքսել է Լավրովը։ Եվ եթե ՀՀ իշխանությունները համաձայն չեն դրան, ապա պետք է նկատել` դրան հակադրվող որևէ արձագանք չի եղել։

Ալմա Աթայի հռչակագիրը Երևանի և Բաքվի միջև բանակցությունների համատեքստում առաջին անգամ հիշատակվել է 2022-ի հոկտեմբերի 6-ի Պրահայի հայտարարության մեջ, որն ընդունվել է Հայաստանի և Ադրբեջանի ղեկավարների կողմից՝ Ֆրանսիայի նախագահի և Եվրոպական խորհրդի ղեկավարի միջնորդությամբ։

Այնուհետև այն հիշատակվել է Հայաստանի, Ռուսաստանի և Ադրբեջանի առաջնորդների 2022թ. հոկտեմբերի 31-ի Սոչիի հայտարարության մեջ։

Ինչպես ավելի վաղ նշել էր Լավրովը, հռչակագրում ասվում է, որ բոլոր միութենական հանրապետությունները կազմում են ԱՊՀ-ն և հաստատում սահմանների անխախտելիությունը։ Լավրովի խոսքով` այն ժամանակ Լեռնային Ղարաբաղի Ինքնավար Մարզը միանշանակ Ադրբեջանական ԽՍՀ մաս էր կազմում։ Հայկական կողմն իր հերթին նշում է, որ հռչակագիրը ստորագրել է վերապահումներով, որոնք հաշվի են առնում 1991թ. սեպտեմբերին Լեռնային Ղարաբաղում կայացած հանրաքվեն: Ադրբեջանն այդ վերապահումները չի ընդունում։