ԵՐԵՎԱՆ, 3 փետրվարի – Sputnik․ Հայաստանի Հանրապետությունը պարտավորություններ ունի Լեռնային Ղարաբաղի ժողովրդի առաջ։ Այս մասին Ադրբեջանի կողմից Լաչինի միջանցքի վերաբերյալ խորհրդարանական լսումների ժամանակ ասաց Շիրակի թեմի առաջնորդ տեր Միքայել արքեպիսկոպոս Աջապահյանը։
Նա ընդգծեց, որ շրջափակելով միջանցքը՝ Ադրբեջանը փորձում է հասնել հայերի վտարմանը Լեռնային Ղարաբաղից, հետևաբար հայ ժողովրդին պահելը պետք է լինի Հայաստանի ռազմավարական առաջնահերթությունը։ Այս համատեքստում արքեպիսկոպոսը նշեց, որ իր համար անհարմար է անգամ համեմատել ադրբեջանա-թուրքական տանդեմի համակարգված գործողությունները հայկական կողմի անտրամաբանական և ապաշնորհ պատասխանի հետ։
«Բերձորի միջանցքի փակ լինելը մեր ընդհանուր դժբախտության, կատաստրոֆիկ իրավիճակի միայն մի մասն է, որի մեջ հայտնվել են Հայաստանն ու հայ ժողովուրդը։ Բերձորի միջանցքը միշտ էլ հաղթաթուղթ է եղել Ադրբեջանի ձեռքին և հիմա էլ շարունակում է՝ մեր տկարության, ապիկարության, թուլության, պատճառով։ Ես ասում եմ «մեր», քանի որ մի կողմից պատասխանատվությունն իմ վրայից չեմ ուզում գցել, մյուս կողմից էլ, ցավոք, իշխանությունն էլ մերն է։ Մենք տարուբերվում ենք մաքսիմալիզմի և մինիմալիզմի միջև։ Սկսել ենք «Պայքար, պայքար, մինչև վերջ» կարգախոսով, իսկ այսօր հասել ծայրահեղ մինիմալիզմի։ Այսինքն՝ 120 հազարին տանք, որ 29,800 քմ-ի վրա 3 մլն մարդուն փրկենք»,- ասաց Աջապահյանը։
Նրա խոսքով՝ չպետք է մոռանալ, որ այդ 120․000-ը ՀՀ քաղաքացիներ են և Հայաստանի Հանրապետությունը պարտավորություններ ունի այդ մարդկանց նկատմամբ, ինչպես պարտավորված կլիներ, եթե Սոմալիում 12 հայ շրջափակման մեջ լիներ։
Հոգևորականը շեշտեց, որ ինքը միշտ քննադատել է իշխանությանը, սակայն իրավիճակն այսօր այնքան ծանր է, որ իրենց գնալով խնդիրներն ավելի կշատանան, և պետք է պարզապես դիմակայելու տարբերակներ գտնել։
«Մեզ կառավարությունում, ազգային ժողովում անհրաժեշտ են «մահապարտներ», որոնք թքած կունենան իրենց սեփական ընտանիքի բարօրության վրա և կմտածեն այս երկրի և բանակի զարգացման մասին։ Եթե դա ունեցանք, ապա Լաչինի միջանցքը կբացվի, Արցախն էլ կդառնա Հայաստանի Հանրապետության անբաժան ու անքակտելի մաս»,- ասաց Աջապահյանը։
Հիշեցնենք` 2022 թ. դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից սկսած` ադրբեջանական կողմը ժամանակ առ ժամանակ անջատում է Արցախի գազամատակարարումը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
Լաչինի միջանցքը շարունակում է փակ մնալ։