ԵՐԵՎԱՆ, 2 փետրվարի – Sputnik. «Մալաթիա» տոնավաճառում ինտենսիվ աշխատանքներ են ընթանում ՀՀ քաղաքաշինության, հրդեհային և տեխնիկական անվտանգության տեսչական մարմնի արձանագրած խնդիրների լուծման ուղղությամբ։ Տեղեկությունը Sputnik Արմենիայի հետ զրույցում հայտնեց ՀՀ ՔՀՏԱ տեսչական մարմնի մամուլի խոսնակ Ելենա Զոհրաբյանը։
Նշենք, որ տեսչական մարմինը «Մալաթիա» տոնավաճառի գործունեությունը փետրվարի 1-ից կասեցրել է, քանի որ տնտեսվարողը արձանագրված 17 խախտումից մի քանիսը չի վերացրել, որոնք կարող են սպառնալիք հանդիսանալ հրդեհների առաջացման, տարածման և մարդկանց անվտանգության համար։
«Մեր աշխատակիցներն այսօր այցելել են տոնավաճառի տարածք և արձանագրել, որ մեծ ուժեր են ներդրվել հայտնաբերված խնդիրները վերացնելու համար։ Որքան շուտ վերացնեն խնդիրները, այնքան ավելի շուտ տոնավաճառը կվերաբացվի»,–ասաց Զոհրաբյանը։
Հիշեցնենք` երեկ «Մալաթիա» տոնավաճառի աշխատակիցները գնացել էին ԱԻՆ պարզելու, թե ինչպես կարող են իրենց խնդրին լուծում տալ։ «Մալաթիա» տոնավաճառի տնօրեն Սամվել Ավետիսյանը հայտարարել էր, որ արդեն բավականին փոփոխություններ արել են, տեսչական մարմնի հանձնարարությունները կատարել են, կշարունակեն կատարել։
Նա հայտարարել էր, որ իրենք բացատրել են, որ 3 ամսով չենք կարող փակել տոնավաճառը, իսկ տեսչական մարմնից էլ խոստացել են, որ երբ անեն առաջնային փոփոխություններ` կաշխատեն։
Երեկ առավոտից տոնավաճառի աշխատակիցները բողոքի ակցիա էին անում` պահանջելով ժամանակ տալ տնօրինությանը` թերությունները վերացնելու համար։