«Մալաթիայի» աշխատակիցները գնում են ԱԻՆ խնդրին լուծում գտնելու համար

ԵՐԵՎԱՆ, 1 փետրվարի – Sputnik. «Մալաթիա» տոնավաճառի աշխատակիցները գնում են ԱԻՆ պարզելու, թե ինչպես կարող են իրենց խնդրին լուծում տալ։ Այս մասին լրագրողների հետ զրույցում ասաց «Մալաթիա» տոնավաճառի տնօրեն Սամվել Ավետիսյանը:

«Մենք երկու օր առաջ արդեն բավականին փոփոխություններ ենք արել, իրենց հանձնարարությունները կատարել ենք, կշարունակենք կատարել։ Մենք նրանց բացատրել ենք, որ 3 ամսով չենք կարա փակենք, իրենք էլ ասացին` դե առաջնային փոփոխությունները արեք ու աշխատեք։ Հիմա գնանք տեսնենք` ինչ են ասում»,– նշեց նա։

Տնօրենը նշում է, որ ամբողջությամբ ու շատ կարճ ժամկետում վերացնել բոլոր թերություններն անհնար է։

«Տեսչական մարմինը նայել է մեր տարածքն ու ասել, որ շատ հրդեհավտանգ չի, այսօր էլ նրանք պետք է պատասխանեն, թե քանի օր ժամանակ են տալիս` շտկելու այդ թերությունները»,– ասաց նա։

«Իրենք ստիպելու իրավունք չունեն, որովհետև եթե այդպես լինի` հիմա շատ–շատ շինություններ Հայաստանում հրդեհավտանգ են, դրա համար առաջնային բաները պետք է անենք ու շարունակենք աշխատել»,– ասաց տնօրենը։

Նշենք, որ առավոտից տոնավաճառի աշխատակիցները բողոքի ակցիա են անում` պահանջելով ժամանակ տալ տնօրինությանը` թերությունները վերացնելու համար։

Երեկ Sputnik Արմենիայի հետ զրույցում ՀՀ քաղաքաշինության, հրդեհային և տեխնիկական անվտանգության տեսչական մարմնի մամուլի խոսնակ Ելենա Զոհրաբյանը հայտնեց, որ փետրվարի 1–ին, «Մալաթիա» տոնավաճառի գործունեությունը կդադարեցվի։ Եթե խոչընդոտներ լինեն, ՀՀ քաղաքաշինության, հրդեհային և տեխնիկական անվտանգության տեսչական մարմինը կդիմի գործընկեր ուժային կառույցների օժանդակությանը` գործընթացն ապահովելու համար։

Հիշեցնենք՝ ՀՀ քաղաքաշինության, հրդեհային և տեխնիկական անվտանգության տեսչական մարմինը որոշել է «Մալաթիա» տոնավաճառի գործունեությունը փետրվարի 1-ից կասեցնել, քանի որ տնտեսվարողը արձանագրված 17 խախտումից մի քանիսը չի վերացրել։