ԵՐԵՎԱՆ, 1 փետրվարի – Sputnik. Քուրդ խմբավորումներն առնչություն ունեն Սպահանում Իրանի ՊՆ–ի օբյեկտներին հասցված անհաջող հարձակման հետ։ Տեղեկությունը հայտնում է «Nournews»–ը` հղում անելով Իրանի ազգային անվտանգության բարձրագույն խորհրդին մոտ կանգնած աղբյուրին։
Աղբյուրն ասել է, որ Իրաքյան Քրդստանում տեղակայված հակահեղափոխական կազմակերպությունների ներկայացուցիչները դետալներ են տեղափոխել Իրան, որոնցով հետագայում հավաքել են անօդաչուները։
Նշվում է, որ տեղափոխումն իրականացվել է Իրանի հյուսիսարևմտյան դժվարանցանելի լեռնային երթուղով։
Հիշեցնենք` հունվարի 29-ի գիշերն անօդաչու թռչող սարքերով հարձակում էր իրականացվել Իրանի ՊՆ ռազմական օբյեկտներից մեկի վրա։ Ավելի ուշ հայտնեցին Ազարշահր քաղաքի գործարանում բռնկված հրդեհի և Քարաջում տեղի ունեցած պայթյունների մասին։ Ոչ պաշտոնական տվյալներով` այնտեղ մարտական անօդաչուների արտադրության գործարաններ են գտնվում։ Ամերիկյան մամուլը գրում է, որ այս ամենի մեջ իսրայելական հետք կա։