ԱՄՆ–ն ուզում է Ուկրաինային 150 կմ հեռահարության հրթիռներ փոխանցել. ԶԼՄ

Մամուլում տեղեկություններ կան, որ սա առաջին դեպքն է։
Sputnik
ԵՐԵՎԱՆ, 1 փետրվարի Sputnik. ԱՄՆ մտադիր է Ուկրաինային 150 կմ հեռավորության վրա թիրախները խոցելու հնարավորությամբ հրթիռներ փոխանցել։ Այս մասին հայտնում է Reuters–ը` հղում անելով սեփական աղբյուրներին։
Պարբերականի տվյալներով` Վաշինգտոնը 2.2 մլրդ դոլարի ռազմական օգնության նոր փաթեթ է պատրաստում, որն առաջին անգամ մեծ հեռահարության ռազմամթերք է ներառում։ Խոսքը, մասնավորապես, ամերիկյան Boeing–ի և շվեդական Saab Group–ի արտադրության GLSDB (Ground Launched Small Diameter Bomb) հրթիռների մասին է։ Նշվում է, որ ԱՄՆ–ն մերժել էր 300 կմ հեռահարության ATACMS հրթիռի փոխանցման ուկրաինական հայտը։
Ուկրաինայում ռազմական հատուկ գործողությունների մեկնարկից հետո Միացյալ Նահանգներն ու ՆԱՏՕ–ի նրա դաշնակիցները միլիարդավոր դոլարների ռազմական տեխնիկա են մատակարարել Ուկրաինայի ԶՈւ-ին։ Մոսկվայում այդ առիթով բազմիցս նշել են, որ Արևմուտքն ուզում է ձգձգել հակամարտությունը։
Հիշեցնենք՝ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 341-րդ օրը։