ԵՐԵՎԱՆ, 31 հունվարի – Sputnik. 2022թ–ի ընթացքում հայաստանյան բանկերում ավանդների թիվն ավելացել է 43 տոկոսով, ընդ որում`ՀՀ քաղաքացիների ավանդները 2022թ–ի համեմատ ավելացել են 29.4 տոկոսով, օտարերկրյա քաղաքացիներինը` 96.3-ով։ Այսօր հրավիրված ասուլիսում այս տվյալները ներկայացրեց ՀՀ կենտրոնական բանկի նախագահ Մարտին Գալստյանը։
«Եթե բացարձակ թվով ասեմ, ռեզիդենտների ավանդների պաշարային ցուցանիշը 2022թ–ի դեկտեմբերի 31-ի դրությամբ կազմել է 3 մլրդ 370 մլն դրամ, ոչ ռեզիդենտներինը` 1 մլրդ 287»,– ասաց Գալստյանը։
Վարկավորումը 2022թ–ին աճել է 15 տոկոսով, որի հիմանական մասը հիփոթեքային վարկերն են։
Բիզնես վարկերի փոքր թիվը ԿԲ նախագահը մեկնաբանեց տարվա տնտեսական բարենպաստ պայմաններով, որից օգտվելով` տնտեսվարողներից շատերը նույնիսկ նախապես կարողացել են ժամկետից շուտ կանխավճարել իրենց նախկին վարկերը։
«Այն միջոցները, որ գոյացել են այս տարի իրենց մոտ, օգտագործվել են նախկինում ունեցած պարտավորությունները մարելու համար, բնականաբար, խոսք չէր կարող լինել նոր պարտավորություններ ձևավորելու մասին»,– ասաց նա։
Գալստյանը չբացառեց, որ տնտեսվարողները ձեռնպահ են մնում նաև վարկային մեծ նախագծեր ձեռնարկելուց` տարվա ընթացքում ձևավորված տնտեսական անորոշությունների հետևանքով։
«Բայց, օրինակ, շինարարության մեջ մենք տեսնում ենք, որ լայնածավալ ներդրումներ կան, ուստի կա նաև որոշակի վարկավորում»,– նշեց նա։
ԿԲ–ի տվյալով` հայաստանյան ձեռնարկություններն անցած տարի ավելի շատ ավանդներ են պահ տվել բանկերին, քան վարկեր վերցրել։ ԿԲ–ի մասնագետները հուսով են, որ անցած տարվա ընթացքում ձևավորված ու չօգտագործված ֆինանսական միջոցները 2023-ին կուղղվեն ներդրումային ծրագրերի իրականացմանը։