ԵՐԵՎԱՆ, 31 հունվարի – Sputnik. Հունաստանի վարչապետ Կիրիակոս Միցոտակիսը Ճապոնիա կատարած այցի ժամանակ հայտարարել է, որ Հունաստանն Ուկրաինային «Leopard 2» տանկեր չի մատակարարելու։ Տեղեկությունը Տոկիոյից հայտնել է ERT հունական հանրային հեռուստատեսության թղթակիցը, հայտնում է ՌԻԱ Նովոստին։
Թղթակցի խոսքով՝ Միցոտակիսը նման հայտարարություն է արել Nikkei Asia-ին տված հարցազրույցում։
«Մենք զգալի ռազմական աջակցություն ենք ցուցաբերել Ուկրաինային, ինչպես, օրինակ, հետևակի զրահապատ մեքենաներ, բայց մենք չենք տա «Leopard 2» տանկերն այն պարզ պատճառով, որ դրանք անհրաժեշտ են մեր պաշտպանական ռազմավարության համար։ Մենք ուզում ենք աջակցել Ուկրաինային, բայց ոչ մեր պաշտպանական հնարավորությունների հաշվին»,-ասել է վարչապետը։
Նշենք, որ Հունաստանն առաջիններից էր, որ զենք ուղարկեց Ուկրաինա արդեն 2022 թվականի փետրվարի 27-ին՝ Ռուսաստանի Դաշնության հատուկ ռազմական գործողության մեկնարկից մի քանի օր անց։ Հունաստանը Լեհաստանի տարածքով 40 տոննա տեխնիկա ուղարկեց երկու C-130 ինքնաթիռներով։ Դրանից հետո նույնպես Հունաստանը զենքի և ռազմական տեխնիկայի խմբաքանակներ էր ուղարկում։
Հիշեցնենք՝ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 340-րդ օրը։