ԵՐԵՎԱՆ, 30 հունվարի - Sputnik. Արարատի մարզի Հայանիստ գյուղի խաչմերուկում ճանապարհատրանսպորտային պատահար է տեղի ունեցել, ինչի հետևանքով ավտոմեքենան սկսել է այրվել։ Տեղեկությունը հայտնում է ներքին գործերի նախարարության փրկարար ծառայության մամուլի ծառայությունը։
Դեպքի մասին ահազանգը ստացվել է հունվարի 30-ին, ժամը 09:15-ին։
Արարատի մարզի Հայանիստ գյուղի խաչմերուկում ճանապարհատրանսպորտային պատահար է տեղի ունեցել
© ՀՀ ՆԳՆ փրկարար ծառայություն
«Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։ Պարզվել է, որ Հայանիստ գյուղի խաչմերուկի մոտակայքում «Mitsubishi Pajero iO» մակնիշի ավտոմեքենան (վարորդ՝ Մ. Վ., ծնված 1991 թ.) դուրս է եկել ճանապարհի երթևեկելի հատվածից, բախվել էլեկտրական սյանը և բռնկվել»,– ասված է հաղորդագրությունում։
Նշվում է, որ վարորդը, ուղևորներ Գ. Վ.-ն (ծնված 2019 թ.) և Հ. Վ.-ն (ծնված 2020 թ.) հոսպիտալացվել են «Էրեբունի» ԲԿ։
Հրդեհը մեկուսացվել է 09:37-ին, մարվել՝ 09:47-ին: Ավտոմեքենան այրվել է: