ԵՐԵՎԱՆ, 30 հունվարի – Sputnik. Ժամեր առաջ դիմակավորված անձինք մտել են Դավիթ Գալստյանի` «Պատրոն Դավոյի» տուն և բերման ենթարկել նրան։ Տեղեկությունը հայտնում է «Հրապարակը»։
ԶԼՄ–ի տեղեկություններով` Դավիթ Գալստյանն ու իր փաստաբանը Ազգային անվտանգության ծառայությունում են: Առայժմ հայտնի չէ, թե ինչ գործով է նա ԱԱԾ տարվել։
Հիշեցնենք` 2021թ–ի սեպտեմբերի 30-ին ԱԱԾ–ն հայտնել էր, որ ՀՀ պաշտպանության նախկին նախարար Դավիթ Տոնոյանն ու զենքի մատակարարմամբ զբաղվող Դավիթ Գալստյանը ձերբակալվել են առանձնապես խոշոր չափերի հափշտակություն կատարելու կասկածանքով։
2022–ի մարտին Վերաքննիչ դատարանն ազատ արձակեց զենքի մատակարարմամբ զբաղվող Դավիթ Գալստյանին 50 մլն գրավի դիմաց։
Այս գործով մեղադրանք է առաջադրվել նաև ԳՇ պետ Արտակ Դավթյանին, ԳՇ պետի նախկին տեղակալ Ստեփան Գալստյանին, ՀՀ ՊՆ ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանին և ավիացիայի վարչության գլխավոր ինժեներ Վլադիմիր Բաբայանին: