ԵՐԵՎԱՆ, 29 հունվարի - Sputnik. Կարմիր խաչի միջազգային կոմիտեի միջնորդությամբ Լաչինի միջանցքով այսօր 11 հոգի Հայաստանից տեղափոխվել է Լեռնային Ղարաբաղ։ Այս մասին Sputnik Արմենիայի հետ զրույցում ասաց ԿԽՄԿ հայաստանյան գրասենյակի հաղորդակցման և կանխարգելման ծրագրերի ղեկավար Զառա Ամատունին։
«Նրանք կվերամիավորվեն իրենց ընտանիքների հետ»,– նշեց Ամատունին։
Բացի այդ, ԿԽՄԿ բեռնատարով դեղորայք և այլ պարագաներ են մատակարարվել տեղի առողջապահական հաստատություններին։
Հիշեցնենք, որ վերջին անգամ հունվարի 27-ին է ԿԽՄԿ միջնորդությամբ և ուղեկցությամբ Հայաստանից Լաչինի ճանապարհով 18 մարդ տեղափոխվել ԼՂ` ընտանիքի հետ վերամիավորվելու նպատակով։ 2 անձ էլ տեղափոխվել է Հայաստան։
Նշենք, որ դեկտեմբերի 12-ից, երբ Շուշի–Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող միակ Ստեփանակերտ–Գորիս ճանապարհը, շուրջ 1100 անձ զրկված էր իր տուն վերադառնալու հնարավորությունից, որոնց թվում էին ավելի քան 270 երեխա։
Դեկտեմբերի 13-ից սկսած` ադրբեջանական կողմը ժամանակ առ ժամանակ անջատում է Արցախի գազամատակարարումը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
Լաչինի միջանցքը շարունակում է փակ մնալ։