ԵՐԵՎԱՆ, 29 հունվարի - Sputnik. Արցախի Հանրապետությունում անխափան գազամատակարարման պարագայում հունվարի 30-ից բոլոր դասերը կվերսկսվեն։ Այս մասին հայտնում է Արցախի տեղեկատվական շտաբը։
«Կսկսեն գործել հանրակրթական դպրոցների նախադպրոցական խմբերը (առանց սննդի, ժամը 9:00-13:00–ն) և 1-12-րդ դասարանների, արտադպրոցական (երաժշտական և արվեստի դպրոցներ, մարզադպրոցներ ու մանկապատանեկան ստեղծագործական կենտրոններ) և նախնական (արհեստագործական) ու միջին մասնագիտական ուսումնական հաստատությունները»,– ասված է հաղորդագրությունում։
Գազամատակարարման խափանման դեպքում կվերսկսվեն միայն 9-12-րդ դասարանների դասերը, համապատասխան պայմաններում՝ հատուկ գրաֆիկով, որի վերաբերյալ կտրամադրվի լրացուցիչ տեղեկություն։
Արցախի ԿԳՄՍ նախարարությունը տեղեկացնում է, որ համապատասխան կառույցները աշխատանքներ են տանում բնական գազով ջեռուցվող ուսումնական հաստատություններում ջեռուցման համակարգերը վերափոխելու ուղղությամբ։
Նախարարությունը ծնողներին հորդորում է երեխաներին հագցնել տաք հագուստ:
Հիշեցնենք, որ 2022-ի դեկտեմբերի 14-ից Արցախում դադարեցվել են գազով ջեռուցվող ուսումնական հաստատությունների պարապմունքները, իսկ 2023-ի հունվարի 19-ից՝ հանրակրթական ուսումնական հաստատությունների նախադպրոցական խմբերի, 1-12-րդ դասարանների և նախնական (արհեստագործական) ու միջին մասնագիտական ուսումնական հաստատությունների դասագործընթացը։
Դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից սկսած` ադրբեջանական կողմը ժամանակ առ ժամանակ անջատում է Արցախի գազամատակարարումը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
Լաչինի միջանցքը շարունակում է փակ մնալ։