ԵՐԵՎԱՆ, 28 հունվարի – Sputnik. 2027 թվականին տղամարդկանց և կանանց սպորտային մարմնամարզության Եվրոպայի առաջնությունը կկայանա Երևանում: Տեղեկությունը հայտնում է Հայաստանի մարմնամարզության ֆեդերացիան։
«Պատմական նվաճում հայկական մարմնամարզությունում։ Հայաստանի Հանրապետության կառավարության բարձր հովանու ներքո, Հայաստանի մարմնամարզության ֆեդերացիայի նախագահ Գագիկ Վանոյանի և իր թիմի ջանքերով 2027 թվականին կայանալիք տղամարդկանց և կանանց սպորտային մարմնամարզության Եվրոպայի առաջնությունը կկայանա Երևանում»,– ասված է հաղորդագրությունում:
Ֆեդերացիան այս ընտրության համար շնորհակալություն է հայտնում մարմնամարզության Եվրոպական ֆեդերացիայի նախագահին, նախագահական խորհրդի գործադիր կոմիտեին և տեխնիկական կոմիտեի նախագահներին և խոստանում, որ Հայաստանն առավելագույնն է անելու Երևանում կայանալիք առաջնությունը անմոռանալի դարձնելու համար։