Կարեն Խաչանովը պարտվել է Ավստրալիայի բաց առաջնության կիսաեզրափակիչում

ԵՐԵՎԱՆ, 27 հունվարի – Sputnik. Հայկական ծագումով ռուսաստանցի թենիսիստ Կարեն Խաչանովը Մելբուրնում անցկացվող Ավստրալիայի բաց առաջնության (Australian Open) կիսաեզրափակիչում պարտվել է հույն Ստեֆանոս Ցիցիպասին։ Տեղեկությունը հայտնում է ՌԻԱ Նովոստին։

Խաչանովը, որը հանդես է եկել 18 համարի ներքո, պարտվել է 7:6 (7:2), 6:4, 6:7 (6:8), 6:3 հաշվով: Խաղը տևել է 3 ժամ 21 րոպե։ Նա 14–րդ անգամն անընդմեջ պարտվել է համաշխարհային վարկանիշի լավագույն հնգյակում ընդգրկված մարզիկին։

Եզրափակիչում Ցիցիպասը կխաղա Նովակ Ջոկովիչ (Սերբիա, 4-րդ համար)-Թոմի Փոլ (ԱՄՆ) հանդիպման հաղթողի հետ։

26-ամյա Խաչանովն առաջին անգամ էր խաղում Ավստրալիայի բաց առաջնության կիսաեզրափակիչում, նա իր կարիերայի ընթացքում երկրորդ անգամ էր Մեծ սաղավարտի մրցաշարում հասել այդ փուլին. 2022 թվականին պարտվել էր US Open–ի կիսաեզրափակիչում։

Ցիցիպասը 24 տարեկան է։ Նա աշխարհի չորրորդ ռակետն է և Պրոֆեսիոնալ թենիսիստների միության (ATP) 9 մրցաշարերի հաղթող անհատական կարգում։

Ավստրալիայի բաց առաջնությունը` Մեծ սաղավարտի այս խաղաշրջանի առաջին մրցաշարը, կավարտվի հունվարի 29-ին։ Նախորդ տարվա հաղթող իսպանացի Ռաֆայել Նադալը պայքարն ավարտեց երկրորդ մրցաշրջանում։