ԵՐԵՎԱՆ, 27 հունվարի – Sputnik. Հայաստանում կներդրվի անտառային հրդեհների կանխարգելման իտալական մոդելը` հարմարեցնելով ռելիեֆին ու կլիմային։ Պիլոտային մարզը կլինի Լոռին։ Այս մասին հայտնում է ՀՀ ՆԳՆ փրկարար ծառայությունը։
Այս համաձայնության հայ և իտալացի մասնագետները եկել են Եվրոպական միության «Արևելյան գործընկերություն» նախաձեռնության շրջանակներում իրականացվող «Տեխնածին և տարերային աղետների կանխարգելում, պատրաստվածություն և արձագանքում արևելյան տարածքում» ծրագրի շրջանակներում։
«Իտալիայում անտառային հրդեհների կանխարգելման և արձագանքման արդյունավետ տարբերակներ կան՝ որսիչներն ու արբանյակները, որոնց միջոցով հավաքվում է տեղեկատվություն։ Հրդեհավտանգ ժամանակահատվածում վերլուծական կենտրոնը գրանցում է որսիչների հաղորդած տեղեկությունը, փոխանցում արձագանքող ուժերին»,– հայտարարել է ՓՈւՎ հրշեջ-փրկարարական պատրաստության բաժնի ավագ հրահանգիչ, փ/ծ փոխգնդապետ Սամվել Այվազյանը։
Հայաստանը հետաքրքրված է հատկապես համակարգչային ծրագրի այն հատվածով, որտեղ հնարավոր է մուտքագրել, օրինակ, կոնկրետ տարածքը, քամու ուղղությունն ու ուժգնությունը, օդի խոնավությունը և տեսնել , թե ինչպես է ընթանում հրդեհի զարգացումը։
«Ճիշտ է՝ մեր փրկարարներն անընդհատ շրջում են հատուկ պահպանվող տարածքներում, տեղեկացնում հրդեհի հավանականության ու վտանգների մասին, սակայն ծրագիրը կօգնի կատարելագործել կանխարգելման հմտությունները»,- նշել է մասնագետը։
Հայ մասնագետները անդրադառնալով հրդեհների կանխարգելման ու մարման համար կատարված աշխատանքներին հայտնել են, որ նախորդ տարի Խոսրովի արգելոցում ծավալուն աշխատանքներ են տարվել, տեղադրվել են ջրի խողովակներ, բաքեր։ Այսուհետ հրշեջ-մեքենաների՝ ջրով լիցքավորելու խնդիրն ավելի հեշտ կլուծվի։