ԵՐԵՎԱՆ, 26 հունվարի – Sputnik. ՀՀ գլխավոր դատախազ Աննա Վարդապետյանը «Հայաստան» դաշինքի պատգամավոր Արմեն Չարչյանին պատգամավորական անձեռնմխելիությունից զրկելու վերաբերյալ միջնորդության հիմքում ներկայացրել է ՊՊԾ գնդի գրավման ժամանակ «Սասնա ծռերին» հաց հասցրած «Հաց բերողի»՝ Արթուր Սարգսյանի մահվան գործը, գրում է «Հրապարակը»։
Ավելի վաղ տեղեկացրել էինք, որ Աննա Վարդապետյանն Արմեն Չարչյանի նկատմամբ քրեական հետապնդում հարուցելուն համաձայնություն տալու մասին միջնորդագիր է ներկայացրել ԱԺ նախագահ Ալեն Սիմոնյանին։
«Ո՞րն է բժիշկ Արմեն Չարչյանի մեղքը: 2016թ. դեկտեմբերի 30-ին «Հաց բերողը» կալանքից ազատվեց միջգերատեսչական հանձնաժողովի որոշմամբ, որն արձանագրեց, որ նրա առողջական վիճակը համատեղելի չէ կալանքի հետ։ Սակայն այդ որոշումից 1 օր անց քննիչը կրկնակի փորձաքննություն նշանակեց: Երկրորդ փորձաքննությունը կատարվել է «Փորձաքննությունների ազգային բյուրո»-ում, հանձնաժողովի կազմում էր նաև Չարչյանը։ Այդ եզրակացությունից հետո «Հաց բերողին» կրկին կալանավորեցին. նոր եզրակացությամբ` նրա առողջական վիճակն անհամատեղելի չէր համարվել կալանքի հետ»,–գրում է թերթը։
Սակայն հարցն այն է, որ բժշկական հանձնաժողովը փաստաթղթերի հիման վրա էր եզրակացություն տվել, քանի որ Արթուր Սարգսյանը բժշկական հետազոտություն չէր անցել, հանձնաժողովին չէր ներկայացվել: Եվ ամենակարևորը՝ Չարչյանը եզրակացությանը կից հատուկ կարծիք էր գրել` շեշտելով, որ եթե Արթուր Սարգսյանին կարողանային զննել, գուցե եզրակացությունն այլ կլիներ։ Թերթը հիշեցնում է, որ, ի վերջո, եզրակացությունը կազմվել է կոլեկտիվ մարմնի` հանձնաժողովի կողմից, և ընդամենը խորհրդատվություն է` պատկան մարմինը կարող էր փոխել խափանման միջոցն առանց այդ եզրակացության.«Եվ հիմա բազում պաշտոնյաների և անձանց մեղքը մեկ անձի վրա դնել, որը հատուկ կարծիք է գրել` եթե ոչ անբարոյականության, ապա զավեշտի թեմա կարող է դառնալ»:
«Հրապարակը» զրուցել է «Փորձաքննությունների ազգային բյուրո»-ի տնօրեն Արգամ Հովսեփյանի հետ, որը վստահեցրել է` ամեն բան եղել է օրենքի տառին համապատասխան, և հավելել, որ ի պաշտոնե իր գործառույթն էր նման փորձաքննություն կազմակերպելը: Սակայն Հովսեփյանը չի ցանկացել պատասխանել հարցին՝ ինքը հայտնվե՞լ է իրավապահների ուշադրության տիրույթում, կամ այս գործով ունի՞ որևէ կարգավիճակ, բայց պնդել է, որ եզրակացությունը կազմելիս որևէ պարտադրանք չի եղել։
Հիշեցնենք` ըստ դատախազության` Չարչյանը, ՀՔԾ վարույթում քննված քրգործով որպես փորձագետ ընդգրկված լինելով Ա.Ս.-ին ծանր և առանձնապես ծանր հանցագործությունների համար առաջադրված մեղադրանքների առնչությամբ նշանակված կրկնակի հանձնաժողովային դատաբժշկական փորձաքննության հանձնաժողովի կազմում, 2017-ի փետրվարի 8-ին ստորագրել է կրկնակի դատաբժշկական հանձնաժողովային փորձաքննության ակնհայտ կեղծ եզրակացությունը։
Հավելենք, որ Չարչյանն անցնում է նաև մեկ այլ քրգործով. նա մեղադրվում է ընտրողներին ուղղորդելու մեջ: Նրա դեմ հարուցված քրգործով նիստերը շարունակվում են։
Հունիսի 18-ին համացանցում հայտնվեց մի ձայնագրություն, որում լսվում էր, թե ինչպես է Չարչյանը աշխատակիցներին հորդորում ԱԺ ընտրությանը մասնակցել` ակնարկելով չքվեարկել գործող իշխանությունների օգտին։ Նույն օրը Չարչյանը ձերբակալվեց։
Հունիսի 21-ին Կենտրոնական ընտրական հանձնաժողովը թույլ տվեց քրեական հետապնդում սկսել Չարչյանի նկատմամբ։ Չարչյանը կալանավորվեց, ապա 15 մլն գրավի դիմաց ազատ արձակվեց։
Օգոստոսի 23-ին Չարչյանը կրկին կալանավորվեց։
Դեկտեմբերի 10-ին Երևանի ընդհանուր իրավասության դատարանը հրատապ նիստի ժամանակ որոշեց ազատ արձակել Չարչյանին։ Դատավոր Վահե Միսակյանի որոշմամբ` խափանման միջոց ընտրվեց ստորագրությունը չհեռանալու մասին։