ԵՐԵՎԱՆ, 26 հունվարի – Sputnik. ՀՀ նախագահ Վահագն Խաչատուրյանն այսօր ընդունել է ֆինանսների նախարար Վահե Հովհաննիսյանին: Տեղեկությունը հայտնում է նախագահի մամուլի ծառայությունը։
Նախարարը ներկայացրել է տարվա մեկնարկին հայաստանյան ֆինանսատնտեսական ոլորտում նախատեսվող ծրագրերն ու միջոցառումները: Նա խոսել է նախաձեռնվող քայլերի մասին, որոնց նպատակը գերատեսչության աշխատանքի արդյունավետության ու աշխատակիցների մասնագիտական հմտությունների զարգացումն է։
«Հանդիպման ընթացքում անդրադարձ է արվել ընթացիկ տարում հայաստանյան ֆինանսական շուկայում տիրող ընդհանուր իրավիճակին, առկա հիմնախնդիրներին և դրանց լուծման հնարավորություններին»,– նշված է հաղորդագրության մեջ:
Խաչատուրյանը պատրաստակամություն է հայտնել իր հնարավորությունների սահմաններում աջակցել ֆինանսների նախարարության կողմից իրականացվող բարեփոխումներին և ծրագրերին: