ԵՐԵՎԱՆ, 23 հունվարի – Sputnik. Ռուսաստանի նախագահ Վլադիմիր Պուտինը ԵԱՏՄ-ի համար հրատապ խնդիր է անվանել ռիսկերի նվազեցումը, որոնք փոխադարձ առևտրի համար ստեղծում է օտարերկրյա արժույթների և վճարային համակարգերի օգտագործումը։ Այս մասին ասվում է ՌԴ նախագահի ուղերձում, որը հրապարակվել է Կրեմլի կայքում:
«Հրատապ խնդիր է դիտվում տնտեսական ռիսկերի հետևողական նվազեցումը, որոնք փոխադարձ առևտրի համար ստեղծում է օտարերկրյա արժույթների և վճարային համակարգերի օգտագործումը։ Մենք ելնում ենք նրանից, որ միության ներսում կայուն հաշվարկային հարաբերությունների անքակտելի պայման է գործընկերների միացումը Ռուսաստանի Բանկի ֆինանսական հաղորդագրությունների փոխանցման համակարգին և ազգային վճարային համակարգերի փոխգործակցության զարգացումը»,-ասված է ուղերձի տեքստում։
Բացի այդ, ՌԴ ղեկավարի խոսքով, ֆինանսական շուկաների ներդաշնակեցումը պետք է բարենպաստ պայմաններ ստեղծի, որպեսզի անդամ երկրների կապիտալը մնա միավորման ներսում և ներդրվի ազգային տնտեսություններում:
Ռուսաստանի նախագահը նշել է նաև, որ նպատակահարմար է համարում ուսումնասիրել Եվրասիական վարկանիշային գործակալության ձևավորման հնարավորությունը, որը գնահատման գործիքակազմ կապահովի մակրոտարածաշրջանի տարածքում աճող տնտեսական ակտիվության սպասարկման համար։
Նշենք, որ, ինչպես ավելի վաղ հայտարարվել էր Եվրասիական զարգացման բանկի զեկույցում, ԵԱՏՄ տարածքում ձեռնարկությունների միջև ազգային արժույթներով փոխհաշվարկների մասնաբաժինը կազմում է մոտ 70%: Հավելենք, որ ներկայում Ռուսաստանի բանկերի մի մասն անջատված է SWIFT համակարգից, ինչը դժվարացնում է ՌԴ–ի հետ միջազգային բանկային փոխանցումները:
Որպես այլընտրանք օգտագործվում է Ռուսաստանի Կենտրոնական բանկի СПФС վճարային տեղեկատվական համակարգը:
2022 թվականի գարնանը Ռուսաստանը լքեց համաշխարհային վարկանիշային գործակալությունների «մեծ եռյակը» (Fitch, Moody’s, S&P)։ Ռուսական ձեռնարկություններին վարկային վարկանիշ տրամադրելու համար դեռևս 2014 թվականին Ռուսաստանի բանկը տեղական վարկանիշային գործակալությունների աշխատանքի նոր մեթոդաբանություն է ընդունել, իսկ վերջին ամիսներին քննարկվել է նաև եվրասիական մասշտաբով նման գործակալություն ստեղծելու գաղափարը։