ԵՐԵՎԱՆ, 23 հունվարի – Sputnik. Եվրամիության խորհուրդը որոշել է Հայաստանում Եվրոպական միության քաղաքացիական առաքելություն հիմնել` անվտանգության և պաշտպանության ընդհանուր քաղաքականության (CSDP) շրջանակներում: Այս մասին գրված է ԵՄ խորհրդի պաշտոնական կայքում։
Հրապարակման մեջ ասվում է, որ առաքելության նպատակն է աջակցել Հայաստանի սահմանամերձ շրջաններում կայունությանը, վստահության ամրապնդմանը և ԵՄ աջակցությամբ Հայաստանի և Ադրբեջանի միջև հարաբերությունների նորմալացմանն ուղղված ջանքերին նպաստող պայմանների ապահովմանը:
«ԵՄ առաքելության հաստատումը Հայաստանում ազդարարում է Հարավային Կովկասում ԵՄ-ի ներգրավվածության նոր փուլը։ ԵՄ-ն շարունակելու է աջակցել լարվածության լիցքաթափման ջանքերին և աշխատել երկու կողմերի հետ` տարածաշրջանում կայուն խաղաղության հաստատման վերջնական նպատակով»,– ասել է եվրոպական դիվանագիտության ղեկավար Ժոզեպ Բորելը։
Հայաստանում Եվրոպական միության քաղաքացիական առաքելությունը պարեկություն կիրականացնի և կզեկուցի իրավիճակի մասին։ Առաքելությունը նաև կնպաստի միջնորդական ջանքերին Եվրոպական խորհրդի նախագահ Շառլ Միշելի գլխավորած գործընթացի շրջանակներում: Առաքելության ժամկետը նախնական երկու տարի է։ Նշվում է, որ օպերատիվ շտաբը կգտնվի Հայաստանում։
Քաղաքացիական գործողության հրամանատարը կլինի Ստեֆանո Տոմատոն, իսկ մոտ ապագայում կնշանակվի նաև առաքելության ղեկավար։
Ավելի վաղ ԵՄ դիվանագիտական ծառայությունը հայտնել էր, որ Եվրամիությունը նախատեսում է Հայաստանի և Ադրբեջանի սահման ուղարկել նոր առաքելություն, որը կունենա մինչև 100 դիտորդ։
Հիշեցնենք, որ ԵՄ առաջին դիտորդական առաքելությունը Հայաստան է ժամանել 2022-ի հոկտեմբերի 19-ին և մնացել մինչև դեկտեմբերի 19-ը։ Այժմ Հայաստանում է գտնվում ԵՄ տեխնիկական գնահատման խումբը։ Նրանք Հայաստան են գործուղվել ԵՄ նոր քաղաքացիական առաքելության տեղակայման հնարավորությունը դիտարկելու համար: