ԵՐԵՎԱՆ, 18 հունվարի – Sputnik. Հայաստանից Արցախ վերադարձած 19 երեխաների տեղափոխման հետ Կարմիր խաչի միջազգային կոմիտեն կապ չունի. կազմակերպությունն այս հարցում որևէ մասնակցություն չի ունեցել։ Տեղեկությունը Sputnik Արմենիային հայտնեց Կարմիր խաչի միջազգային կոմիտեի հայաստանյան գրասենյակի հաղորդակցման և կանխարգելման ծրագրերի ղեկավար Զառա Ամատունին։
Արցախի մարդու իրավունքների պաշտպան Գեղամ Ստեփանյանը երեկ հայտնել էր` ռուսական խաղաղապահ զորակազմի ուղեկցությամբ Հայաստանից Ստեփանակերտ են վերադարձել 19 երեխաներ։
«Հայաստանում մնացած երեխաների տեղափոխման հարցը, մարդասիրական այլ հարցերի հետ մեկտեղ, մեր ուշադրության կենտրոնում է։ Ամեն դեպքում կկարողանանք աջակցել այս հարցում միայն այն պարագայում, երբ նման որոշում կայացվի բոլոր կողմերից և դիմեն մեզ»,–ասաց Ամատունին։
Նա նշեց, որ այս պահին երեխաների երկրորդ խմբի տեղափոխման մասին պայմանավորվածություն լինել–չլինելու մասին խոսել չի կարող, քանի որ կոմիտեն նախնական պայմանավորվածությունների մասին չի բարձրաձայնում։ Ամեն դեպքում, ըստ Ամատունու, այդ հարցում որոշակի քննարկումներ են իրականացնում։
Հիշեցնենք` դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Դեկտեմբերի 16–ի առավոտյան գազամատակարարումը վերականգնվեց։
Գազամատակարարումը կրկին ընդհատվեց, ապա ժամեր վերականգնվեց նաև հունվարի 17–ին։
Այսօր հայտնի դարձավ, որ Ադրբեջանը կրկին խափանել է Արցախը սնուցող միակ գազատարի աշխատանքը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
Լաչինի միջանցքը շարունակում է փակ մնալ։