ԵՐԵՎԱՆ, 18 հունվարի – Sputnik. Բրովարիում ուղղաթիռի կործանման պատճառների հետաքննությունը կարող է առնվազն մի քանի շաբաթ տևել։ Ինչպես հայտնում է ՌԻԱ Նովոստին, այս հայտարարությունն արել է Ուկրաինայի օդուժի հրամանատարության ներկայացուցիչ Յուրի Իգնատը:
Բրովարիում ուղղաթիռի կործանման վայր
© AP Photo / Daniel Cole
Ավելի վաղ Կիևի ռազմական վարչակազմի ղեկավար Ալեքսեյ Կուլեբան հայտնել էր, որ Բրովարիում մանկապարտեզի և բնակելի շենքերի մոտ ուղղաթիռ է ընկել: Վերջին տվյալով՝ մահացել է 18 մարդ, այդ թվում՝ Ուկրաինայի ներքին գործերի նախարար Դենիս Մոնաստիրսկին և նրա առաջին տեղակալ Եվգենի Ենինը, տուժել է 29 մարդ, որոնցից 15–ը երեխաներ են։
«Պատճառների մասին վաղ է խոսել։ Մի քանի գործոն կա, որոնք կարող են ազդել: Հանձնաժողովը կհետաքննի, և դա մեկ–երկու օրում չի լինի։ Կարծում եմ՝ կստեղծվի պետական հանձնաժողով, որում կընդգրկվեն ավիացիոն մասնագետներ և կուսումնասիրեն կատարվածի պատճառները»,- ասել է Իգնատը համաուկրաինական հեռուստամարաթոնի եթերում։
Նա նշել է, որ արտակարգ իրավիճակների պետական ծառայության ուղղաթիռը (Super Puma) ստացել էին Ֆրանսիայից։
Փրկարարները Բրովարիում ուղղաթիռի կործանման վայրում
© AFP 2024 / Sergei Supinsky
Ուկրաինայի ներքին գործերի նախարարի խորհրդական Անտոն Գերաշչենկոն ավելի վաղ հայտարարել էր, որ ուղղաթիռի կործանման պատճառ է դիտարկվում դիվերսիան, ինչպես նաև տեխնիկայի անսարքությունը, անվտանգության կանոնների խախտումը: