ԵՐԵՎԱՆ, 18 հունվարի – Sputnik. Արևմուտքն Ուկրաինային զենք է մատակարարում, քանի որ «Ռուսաստանը պետք է պարտվի»։ Դավոսի համաժողովում հայտարարել է կանցլեր Օլաֆ Շոլցը։
«Գերմանիան կշարունակի օգնել Ուկրաինային այնքան, որքան անհրաժեշտ կլինի։ Այս կապակցությամբ ցանկանում ենք ընդգծել, որ ուկրաինացիները կարող են հույս դնել մեզ վրա։ Եվ միանգամայն պարզ է, որ մենք կցանկանայինք խուսափել այն բանից, որ դա վերածվի Ռուսաստանի և ՆԱՏՕ-ի միջև պատերազմի», - նշել է Շոլցը։
Կանցլերը հիշեցրել է, որ Գերմանիան Ուկրաինային աջակցություն ցուցաբերելու ծավալով երկրների առաջատարների թվում է, սակայն զենքի մատակարարումներն իրականացվում են «գործընկերների, մասնավորապես՝ ԱՄՆ-ի հետ սերտ հաղորդակցության մեջ, որը կարևոր դերակատարություն ունի այդ հարցում»:
Կանցլերը նշել է, որ ռազմական օգնությունը ներառում է ՀՕՊ համակարգեր, ինչպիսիք են IRIS-T-ը կամ Patriot-ը, հրետանին և ՀՄՄ-ն:
Միևնույն ժամանակ նա խուսափել է պատասխանել հարցին՝ մոտ ժամանակներս Leopard 2 տանկերի մատակարարման հավանականության մասին։
«Մենք այս հարցում համագործակցում ենք մեր ընկերների և գործընկերների հետ և միայնակ ոչինչ չենք անում», - պարզաբանել է Շոլցը:
Հունվարի 17-ին Գերմանիայի պաշտպանության նոր նախարար Բորիս Պիստորիուսը հայտարարել էր, որ երկիրը միջնորդավորված մասնակցում է Ուկրաինայի հակամարտությանը։
Ռուսաստանը ՆԱՏՕ-ի երկրներին նոտա է հղել Ուկրաինային զենք մատակարարելու պատճառով։ ՌԴ ԱԳ նախարար Սերգեյ Լավրովը նշել է, որ ցանկացած բեռ, որը զենք է պարունակում Ուկրաինայի համար օրինական թիրախ կդառնա Ռուսաստանի կողմից։