ԵՐԵՎԱՆ, 17 հունվարի – Sputnik. ՀՀ ԱԺ «Հայաստան» խմբակցությունը դեմ քվեարկեց «Պետական գաղտնիքի մասին» օրենքի և հարակից օրենքների նախագծերի փաթեթն առաջին ընթերցմամբ ընդունելու որոշմանը։ Չնայած դրան` որոշումն ընդունվեց 69 կողմ, 32 դեմ և 1 ձեռնպահ ձայներով։
Ըստ նախագծի` պետական գաղտնիք պարունակող՝ «հատուկ կարևորության» և «հույժ գաղտնի» դրոշմագրեր ունեցող տեղեկություններին առնչվելու թույլտվություն ունեցող անձինք օտարերկրյա պետություններ մասնավոր այցելությունների դեպքում պարտավոր են լինելու սահմանված կարգով տեղեկացնել այդ մասին ԱԱԾ–ին։
Առաջարկվում է նաև «Պետական և ծառայողական գաղտնիքի մասին» օրենքը վերանվանել «Պետական գաղտնիքի մասին», քանի որ միջազգային փորձի ուսումնասիրությունը ցույց է տվել, որ այդպես են անվանվում բնագավառը կարգավորող օրենքները: Այս կապակցությամբ նախագծում այլևս չի կիրառվում «ծառայողական գաղտնիք» հասկացությունը և «գաղտնի» դրոշմագիր ունեցող տեղեկությունները ևս դասվում են պետական գաղտնիքի շարքին:
Նախագծերի փաթեթով առաջարկվում է խստացնել պետական գաղտնիք հրապարակելու համար նախատեսված քրեական պատասխանատվությունը։ Միաժամանակ, վարչական պատասխանատվություն է նախատեսվում «գաղտնի» դրոշմագիր ունեցող տեղեկությունները հրապարակելու, ինչպես նաև պետական գաղտնիք պարունակող տեղեկություններին առնչվելու թույլտվություն ունեցող անձի կողմից իր նկատմամբ կիրառված սահմանափակումները խախտելու համար։
Հունվարի 16-ին ԱԺ–ում օրինագիծը քննարկվել էր, ու «Հայաստան» խմբակցության քարտուղար Արծվիկ Մինասյանը նշել էր, որ այնտեղ չկա որևէ հիմնավորում, թե ինչն է համարվելու պետական գաղտնիք, և ցանկացած պաշտոնյա կարող է առաջարկել իր կամ շրջապատի մասին ցանկացած տեղեկություն պետական գաղտնիք համարել։