ԵՐԵՎԱՆ, 16 հունվարի – Sputnik. Ռուսական կողմը չի ցանկանում ոժ կիրառել. նրանք ցանկանում են բանակցությունների միջոցով հարցը լուծել։ Էստոնիայում նախագահ Ալար Կարիսի հետ հանդիպումից հետո տեղի ունեցած ճեպազրույցի ժամանակ այս մասին ասաց ՀՀ նախագահ Վահագն Խաչատուրյանը` պատասխանելով լրագրողի հարցին, թե ինչ դեր ունեն խաղաղապահները Լաչինի միջանցքում ստեղծված իրավիճակում։
Նա անդրադարձավ 2020 թ. նոյեմբերի 9-ի պայմանավորվածություններին, որոնց շրջանակում խաղաղապահները սկսեցին իրենց աշխատանքը և պետք է ապահովեին Լեռնային Ղարաբաղի և Հայաստանի միջև ուղիղ կապ։ Խոսքը 90 կմ ձգվող ճանապարհի մասին է։ Խաչատուրյանն ընդգծեց, որ այդտեղ երկու պատասխանատուներ կան` խաղաղապահներ, որոնք պետք է ապահովեն անվտանգությունը, և Ադրբեջան, որը խոչընդոտներ չպիտի ստեղծի։ Ըստ նրա` Հայաստանը` որպես այդպիսին, այնտեղ անելիք չունի։
«Հիմա Ադրբեջանն իր պարտավորությունները չի կատարում, արհեստական խոչընդոտ է ստեղծել, և դեկտեմբերի 12-ից մինչև այսօր փակ է այդ ճանապարհը։ Որպեսզի հասկանաք, թե ինչ խնդիրներ է դա առաջ բերում, ասեմ` այդ ճանապարհով օրական 300-400 մեքենա է անցել, որը տեղափոխել է Լեռնային Ղարաբաղի բնակչության կենսապահովման համար անհրաժեշտ ամեն ինչ` սննդամթերք, շինանյութ և այլն»,– նշեց Խաչատուրյանը։
Նրա տեղեկություններով` վերջին 40 օրերի ընթացքում ընդամենը 400 մեքենա է անցել, որոնք հիմնականում հումանիտար նպատակներով են տեղափոխություն իրականացրել։
ՀՀ նախագահը համառոտ ներկայացրեց Արցախում ստեղծված իրավիճակը` առաջնային անհրաժեշտության սննդամթերքը կտրոններով են տալիս, խանութներում ոչինչ չի վաճառվում, հովհարային անջատումներ են սկսվել և այլն։
«Կարելի է ասել, որ մինչ դեկտեմբերի 12-ը միջանցքը հստակ աշխատում էր։ Հիմա ես հասկանում եմ, որ ռուսական կողմը չի ցանկանում ուժ կիրառել, նրանք բանակցությունների միջոցով են փորձում հարցը կարգավորել։ Բայց մենք հիմա պահանջ ունենք իրենց նկատմամբ։ Ադրբեջանի նկատմամբ էլ, իհարկե, ունենք, բայց Ադրբեջանը, ինչպես միշտ, արհամարհում է կամ որևէ ձևով չի արձագանքում, բայց մենք հույս ունենք, որ ռուսական կողմը կարձագանքի և ինչ–որ ձևով միջոցներ կկիրառի, որպեսզի կարողանա էդ միջանցքն ապահովել»,– հայտարարեց Խաչատուրյանը։
Նա նշեց, որ մանրամասներին չի տիրապետում, թե ինչ արդյունք կա բանակցություններից, որոնք ամեն օր տեղի են ունենում Լեռնային Ղարաբաղի ղեկավարների ու ռուս խաղաղապահների միջև։
ՀՀ նախագահը հավելեց, որ երկու օրից Եվրախորհրդարանում քննարկում տեղի կունենա Լաչինի միջանցքի հարցով։
Դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Դեկտեմբերի 16–ի առավոտյան Արցախի պետնախարար Ռուբեն Վարդանյանը հայտնեց, որ Արցախում գազամատակարարումը վերականգնվել է, և դա արվել է առանց որևէ նախապայմանի։
Լաչինի միջանցքը, սակայն, շարունակում է փակ մնալ։