ԵՐԵՎԱՆ, 15 հունվարի - Sputnik. «Ազգային ժողովրդավարական բևեռ» արմատական կազմակերպության անդամները դադարեցրել են Գյումրիի ռուսական 102-րդ ռազմաբազայի հարակից տարածքում կազմակերպած ակցիան, քանի որ ոստիկանությունը չի թույլատրել նրանց վրաններ տեղադրել։ Այս մասին Գյումրիից հայտնում է Sputnik Արմենիայի թղթակիցը։
«Բախումներից խուսափելու համար, որոշել ենք ավարտել հավաքը, հույս ունենք, որ հաջորդ անգամ նախատեսված հավաքին ավելի շատ մարդ կմիանա»,– հայտարարել են ակցիայի մասնակիցները։
Ավելի վաղ հայտնել էինք, որ «Ազգային ժողովրդավարական բևեռը» բողոքի ակցիա է իրականացրել Գյումրիում տեղակայված ռուսական 102-րդ ռազմաբազայի երկրորդ մուտքի հարակից տարածքում, ապա ավտոերթով շարժվել են Գյումրիի փողոցներում։
«Շրջափակում հանուն ապաշրջափակման» խորագրով հավաքի նպատակն է շրջափակելով Գյումրիում ժամանակավոր տեղակայված ռուսական 102-րդ ռազմաբազան՝ պահանջել Բերձորի միջանցքի երկկողմանի անխափան աշխատանքի ապահովում։
Ոստիկանները Գյումրիում տեղակայված ռուսական 102-րդ ռազմաբազայի մոտ
© Sputnik
Գյումրիում իրազեկման ակցիա իրականացնելուց հետո «Բևեռի» անդամները վերադարձել էին Գյումրիում տեղակայված ռուսական 102-րդ ռազմաբազայի գլխավոր մուտքի մոտի հարակից տարածք ու հայտնել էին, որ վրաններ են տեղադրելու ու շուրջօրյա մնալու են այդտեղ։
«Ես ոստիկանության հետ բանակցել եմ, որ մեր ակցիան շարունակական լինի, մինչև Բերձորի (Լաչինի) միջանցքը չբացվի։ Վրաններ տեղադրելու համար մենք պետք է դիմեինք Շիրակի մարզպետարան, սակայն այսօր այն փակ է, իմ կարծիքով ճիշտ կլինի ոստիկանությունը ինքը օպերատիվ կերպով կապվի Շիրակի մարզպետարանի ադմինիստրացիայի հետ, որպեսզի մենք կարողանանք թույլտվություն ստանալ։ Մենք չենք կարող դիմում գրել, հետո օրերով սպասել»,– հայտարարել է ակցիայի մասնակից Արմեն Լուսինյանը։
Արմեն Լուսինյանը
© Sputnik
Նշենք, որ ռուսական 102-րդ ռազմաբազայի հարակից տարածքում հոգեբուժարան և բազմաթիվ բնակելի տներ կան։ Եթե ակցիայի մասնակիցները փակեն փողոցը, ապա կխոչընդոտեն մարդկանց անցուդարձը։
Հիշեցնենք, որ նման ակցիա «Ազգային ժողովրդավարական բևեռն» անցկացրել էր նաև հունվարի 8 -ին՝ փորձելով փակել Գյումրիում դեպի ռազմաբազա տանող հատվածը, սակայն ոստիկանության աշխատակիցները ցուցարարներին բերման ենթարկեցին հավաքների մասին օրենքը խախտելու և ոստիկանների օրինական պահանջներին չենթարկվելու հիմքով: