ԵՐԵՎԱՆ, 14 հունվարի – Sputnik. «Եդինայա Ռոսիա» կուսակցության նախագահ, ՌԴ Անվտանգության խորհրդի ղեկավարի տեղակալ Դմիտրի Մեդվեդևը խայտառակություն է անվանել ԱՄՆ նախագահ Ջո Բայդենի և Ճապոնիայի վարչապետ Ֆումիո Կիսիդայի` միջուկային զենքի հարցով պայմանավորվածությունները։
Հունվարի 13-ին ԱՄՆ-ի և Ճապոնիայի ղեկավարները հանդիպում են անցկացրել Վաշինգտոնում։ Երկու առաջնորդների բանակցություններից հետո արված համատեղ հայտարարության մեջ խոսվում է Ուկրաինայում Ռուսաստանի կողմից միջուկային զենքի կիրառման անթույլատրելիության մասին: ԱՄՆ-ն և Ճապոնիան հայտարարել են, որ Ռուսաստանի կողմից Ուկրաինայում միջուկային զենքի ցանկացած կիրառում մարդկության դեմ թշնամական գործողություն կլինի։
«Դա այնպիսի հրեշավոր ամոթ է, որ նույնիսկ չեմ մեկնաբանի մեր պետության միջուկային ծրագրերի շուրջ պարանոյան։ Ապա մտածեք` Ճապոնիայի կառավարության ղեկավարը նվաստացուցիչ հպատակային էքստազի մեջ անհեթեթություններ է խոսում Ռուսաստանի մասին՝ դավաճանելով Հիրոսիմայի և Նագասակիի միջուկային խարույկի մեջ այրված հարյուր հազարավոր ճապոնացիների հիշատակը։ Եվ Կիսիդան բացարձակ թքած ունի, որ միակ երկիրը, որը լիարժեք միջուկային զենք է կիրառել, ԱՄՆ-ն էր։ Իսկ նրա միակ զոհը՝ իր սեփական հայրենիքը»,- գրել է ՌԴ Անվտանգության խորհրդի փոխնախագահը Telegram-ում։
Մեդվեդևը նշել է, որ լավ կլիներ՝ Ճապոնիայի վարչապետը միջուկային հարվածի մասին հիշեցներ ԱՄՆ նախագահին և ապաշխարություն պահանջեր, որն ամերիկյան ղեկավարությունն այդպես էլ չի արտահայտել է պատերազմի այդ գործողության համար։
«Բայց ոչ, Կիսիդան ամերիկացիների համար միայն սպասարկող անձնակազմն է։ Իսկ ծառաները չեն կարող համարձակություն ունենալ»,-նշել է նա։
Մեդվեդևի խոսքով՝ մնում է միայն խղճալ ճապոնացիներին։
«Չէ՞ որ նման խայտառակությունը կարելի է լվանալ միայն վերադառնալուն պես սեպպուկու անելով հենց իրենց կառավարության նիստում։ Չնայած ճապոնական վասալների այս սերնդին պատվի հասկացությունը բնորոշ չէ»,-ամփոփել է Մեդվեդևը։
Նշենք, որ հանդիպման ընթացքում Բայդենն ու Կիսիդան վստահեցրել են նաև, որ կշարունակեն աջակցել Կիևին և պատժամիջոցներ սահմանել Մոսկվայի դեմ։