ԵՐԵՎԱՆ, 13 հունվարի – Sputnik. Ուկրաինան պայմանավորվել է Իսրայելի հետ ռազմական օգնություն ստանալու վերաբերյալ. Երուսաղեմն արդեն սկսել է Կիևին փոխանցել հրթիռների և անօդաչուների մասին ծանուցման տեխնոլոգիաներ։ Այս մասին, ՌԻԱ Նովոստիի փոխանցմամբ, հայտարարել է Իսրայելում Ուկրաինայի դեսպան Եվգենի Կորնիյչուկը։
«Եվ ես կարծում եմ, որ որոշ ժամանակ անց մենք դրանք ամբողջությամբ կստանանք», – ասել է դեսպանը։
2022 թվականի հոկտեմբերին Ուկրաինայի նախագահ Վլադիմիր Զելենսկին դժգոհում էր, որ Իսրայելը Կիևին չի օգնում օդային տարածքը պաշտպանելու հարցում։
Ավելի վաղ Իսրայելի պաշտպանության նախարար Բենի Հանցը ԵՄ երկրների դեսպանների հետ հանդիպմանը հայտարարել էր, որ Իսրայելը Ուկրաինային սպառազինություն չի մատակարարի մի շարք օպերատիվ նկատառումներից ելնելով, չնայած նրան, որ հրեական պետությունը շարունակում է աջակցել Կիևին մարդասիրական օգնության միջոցով, որի հերթական փաթեթը կհամաձայնեցվի առաջիկայում։ Բացի այդ, Հանցը խոստացել էր, որ Իսրայելը կօգնի Ուկրաինային գնդակոծությունների վերաբերյալ քաղաքացիական վաղ ծանուցման համակարգի մշակման հարցում, ինչի համար հրեական պետությունը ուկրաինացիներից ՀՕՊ միջոցների վերաբերյալ տեղեկություն է խնդրել տրամադրել։