ԵՐԵՎԱՆ, 13 հունվարի – Sputnik. Ֆրանսիան կշարունակի աջակցել Հայաստանին` լինելով նրա ձայնը։ ՀՀ վարչապետ Նիկոլ Փաշինյանի հետ հանդիպումից հետո Twitter-ի իր էջում նման գրառում է արել Ֆրանսիայի ԱԺ նախագահ Յաել Բրաուն-Պիվեն։
«Հարգանք Հայաստանի ինքնիշխանության նկատմամբ, Լաչինի շրջափակման վերացում, երկխոսության շարունակություն հանուն խաղաղության։ Նիկոլ Փաշինյանին ևս մեկ անգամ վերահաստատեցի Ֆրանսիայի աջակցության մասին։ Մենք կլինենք Հայաստանի ձայնը, որը կշարունակի զգուշացնել միջազգային հանրությանը որոշում կայացնելու հրատապության մասին»,–գրել է Բրաուն-Պիվեն։
Հիշեցնենք, որ Բրաուն-Պիվեն Փաշինյանի հետ այսօր կայացած հանդիպման ժամանակ ասել էր, որ Ֆրանսիան շարունակելու է ուշադրության կենտրոնում պահել արցախահայության խնդիրները և հետամուտ լինել դրանց լուծմանը:
Իր հերթին Փաշինյանը նշել էր, որ տարածաշրջանում, մեր երկրի շուրջ առաջացող և գոյություն ունեցող բոլոր խնդիրների արձագանքը տեսնում ենք Ֆրանսիայում, հատկապես Ֆրանսիայի խորհրդարանական պալատներում:
Հիշեցնենք` դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Դեկտեմբերի 16–ի առավոտյան Արցախի պետնախարար Ռուբեն Վարդանյանը հայտնեց, որ Արցախում գազամատակարարումը վերականգնվել է, և դա արվել է առանց որևէ նախապայմանի։
Լաչինի միջանցքը, սակայն, շարունակում է փակ մնալ։
Հունվարի 10-ին Հայաստանից Արցախը սնուցող միակ՝ Գորիս-Ստեփանակերտ բարձրավոլտ գծի 110 կՎ 33-րդ կմ-ում վթար է արձանագրվել, որի պատճառով այժմ Արցախում էլենտրաէներգիայի մատակարարումն իրականացվում է հովհարային անջատումներով։
Հունվարի 12-ից խափանումներով է գործում նաև ինտերնետ կապը։