ԵՐԵՎԱՆ, 13 հունվարի – Sputnik. Միջազգային փաստահավաք առաքելության գործուղումը ԼՂ անհրաժեշտ է նաևէթնիկ զտման ադրբեջանական քաղաքականության առավել հեռուն գնացող քայլերը կանխարգելելու համար։ Նման արձանագրում է արվել Հայաստանի ու Արցախի ՄԻՊ-երի` Լաչինի միջանցքի արգելափակման հումանիտար հետևանքների վերաբերյալ թարմացված արտահերթ զեկույցում, տեղեկանում ենք ՀՀ ՄԻՊ գրասենյակից։
«Զեկույցում պաշտպաններն անդրադարձել են Լաչինի միջանցքը շրջափակելու վերաբերյալ Ադրբեջանի բարձրաստիճան պաշտոնյաների և հասարակային գործիչների կողմից սադրիչ հայտարարություններին։ Անդրադարձ է կատարվել նաև Ադրբեջանի պաշտոնյաների կողմից էթնիկ զտման շարունակական նշաններին, շրջափակման հետևանքով առաջացած հումանիտար ճգնաժամին, «էկո-ակտիվիստների» ակցիայի կեղծ էությունը հիմնավորող նոր տվյալներին, ինչպես նաև Ադրբեջանի կառավարության հետ ճանապարհը ապօրինաբար փակած անձանց անմիջական կապերին»,–ասված է հաղորդագրության մեջ։
Զեկույցում ՄԻՊ–երն անդրադարձել են նաև բնակչության ազատ տեղաշարժի, բավարար կենսամակարդակի ապահովման, ինչպես նաև սննդի հասանելիության, առողջության պահպանման իրավունքներին ու երեխաների իրավունքների խախտումներին։
Հավելենք, որ զեկույցը կներկայացվի մարդու իրավունքների միջազգային մանդատ ունեցող կազմակերպություններին ու դերակատարներին։
Հիշեցնենք, որ դեկտեմբերի 27-ին Հայաստանի և Արցախի ՄԻՊ-երը կրկին արտահերթ զեկույցով էին հանդես եկել։ Զեկույցում, ի թիվս այլնի, ամփոփվել էր ադրբեջանական հանրային խոսույթը, վերլուծվել ադրբեջանցի պաշտոնատար անձանց հայտարարություններն ու հետևություններ արվել դրանցից։
Հիշեցնենք` դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Դեկտեմբերի 16–ի առավոտյան Արցախի պետնախարար Ռուբեն Վարդանյանը հայտնեց, որ Արցախում գազամատակարարումը վերականգնվել է, և դա արվել է առանց որևէ նախապայմանի։
Լաչինի միջանցքը, սակայն, շարունակում է փակ մնալ։
Հունվարի 10-ին Հայաստանից Արցախը սնուցող միակ՝ Գորիս-Ստեփանակերտ բարձրավոլտ գծի 110 կՎ 33-րդ կմ-ում վթար է արձանագրվել, որի պատճառով այժմ Արցախում էլենտրաէներգիայի մատակարարումն իրականացվում է հովհարային անջատումներով։
Հունվարի 12-ից խափանումներով է գործում նաև ինտերնետ կապը։