ԵՐԵՎԱՆ, 11 հունվարի – Sputnik. Այսօր առավոտից իրավապահները խուզարկություններ են իրականացնում ՀՅԴ Արարատի Մարզային կոմիտեի ներկայացուցիչ Գերասիմ Վարդանյանի` Արտաշատում գտնվող տանը։ Տեղեկությունը Sputnik Արմենիային հայտնեց Վարդանյանի փաստաբան Բենիկ Գալստյանը։
«Այսօր ոչ միայն խուզարկություն են իրականացրել, այլ նաև Գերասիմին հարցաքննության են կանչել ՔԿ-ի Արարատի մարզային վարչություն։ Մեզ համար անհասկանալի է անգամ, թե որ գործի շրջանակներում են նրան կանչել հարցաքննության»,–ասաց Գալստյանը։
Միաժամանակ, «Հայաստան» խմբակցության պատգամավոր Քրիստինե Վարդանյանն էլ իր հերթին Sputnik Արմենիային հայտնեց, որ խուզարկություններ են իրականացվում նաև այլ ՀՅԴ–ականների տներում։
«Վաղ առավոտից Արարատի մարզում և Երևանում մի շարք ՀՅԴ–ականների տներում խուզարկություններ են ընթանում։ Ձերբակալվածների կամ բերման ենթարկվածների մասով այս պահին տեղեկություն չկա։ Մեր գնահատմամբ` սա հերթական ապօրինի գործողություններն են, որոնք ունեն քաղաքական նպատակ»,–ասաց Վարդանյանը։
Նա հավելեց, որ «Հայաստան» խմբակցության որոշ պատգամավորներ այս պահին Արարատի մարզ են ուղևորվում։
Հավելենք, որ ԱԺ պաշտպանության և անվտանգության հարցերի մշտական հանձնաժողովի նիստի ժամանակ էլ հանձնաժողովի անդամ Գեղամ Մանուկյանը հայտնեց` բազմաթիվ ՀՅԴ–ականներ են բերման ենթարկվել։ Նա հավելեց, որ չի մասնակցի նիստին, քանի որ մեկնելու է Արարատի մարզ։
Հիշեցնենք, որ Գերասիմ Վարդանյանն անցնում մեկ այլ քրգործով. նա մեղադրվում է 2020-ի նոյեմբերի 9-ին տեղի ունեցած իրադարձությունների առթիվ հարուցված քրեական գործի շրջանակում` զանգվածային անկարգություններ կազմակերպելու և լրագրողի աշխատանքը խոչընդոտելու համար:
Վարդանյանը 2022-ի մայիսի 12-ին կալանավորվեց։ Նոյեմբերին նա գրավի դիմաց ազատ արձակվեց։