ՀԱՊԿ-ի դեմ դեմարշը խելամիտ որոշում չէր. փորձագետը՝ Հայաստանի անվտանգության դեֆիցիտի մասին

«Մենք տեսնում ենք, որ փաստացի ՀԱՊԿ-ի դեմ ուղղված դեմարշները միտում են դառնում։ Հայկական ղեկավարությունն ակտիվորեն փորձում է գտնել անվտանգության այլընտրանքային աղբյուրներ և երաշխիքներ, հիմնականում՝ Արևմուտքում։ ՀԱՊԿ–ի դեմ դեմարշներն օգտագործվում են Արևմուտքին ինչ–որ ազդանշան ուղարկելու համար առ այն, որ Հայաստանը պատրաստ է նաև իրենց հետ համագործակցել անվտանգային ոլորտում»,– ասաց Հարությունովը։

«Այն պայմաններում, երբ Հայաստանն անվտանգային լծակների ու երաշխիքների լուրջ դեֆիցիտ ունի, երբ Թուրքիան ու Ադրբեջանը շատ հստակ ցույց են տալիս, որ ուժային միջոցներ էլի կարող են կիրառել ՀՀ–ի և Արցախի նկատմամբ։ Ես կարծում եմ, որ ցանկացած ռազմական ուժի ցուցադրում ՀՀ–ի օգտին կլիներ, այդ թվում՝ ՀԱՊԿ զորավարժությունները։ Նույն տրամաբանությամբ անցյալ տարվա աշնանը Ադրբեջանի սահմանների մոտ իրանական բանակի զորավարժությունները բավական մեծ դեր խաղացին Բաքվի նկրտումները զսպելու տեսանկյունից»,– ասաց Հարությունովը։