ԵՐԵՎԱՆ, 11 հունվարի - Sputnik. ՀՀ Ազգային ժողովի խորհրդի նիստում հունվարի 13–ին կքննարկվի 22 պատգամավորի մանդատից զրկելու համար ՍԴ դիմելու հարցը։ Նիստի օրակարգը հրապարկվել է ԱԺ պաշտոնական կայքում։
ԱԺ նախագահի մամուլի խոսնակ Ծովինար Խաչատրյանը Sputnik Արմենիայի հետ զրույցում պարզաբանեց, որ խորհուրդը կրում է իմպերատիվ բնույթ ու հրավիրվում է այն պարագայում, երբ արդեն իսկ հաշված են լինում բացակայությունների քանակը։
«Յուրաքանչյուր պատգամավորի համար առանձին քվեարկություն է լինում, այնուհետև որոշում է կայացվում յուրաքանչյուրի համար անհատապես՝ մանդատից զրկելու հարցով դիմե՞լ ՍԴ, թե՞ ոչ»,– ասաց նա։
Նշենք, որ այսօր որոշ լրատվամիջոցներ գրել էին, որ ԱԺ–ն արդեն դիմել է ՍԴ Իշխան Սաղաթելյանին մանդատից զրկելու հարցով։ Ծովինար Խաչատրյանը նշեց, որ այս ինֆորմացիան չի համապատասխանում իրականությանը, քանի որ առանց խորհրդի նիստի նման դիմում չէր կարող լինել։ Իսկ ԱԺ պաշտոնական կայքում նշված է, որ խորհրդի նիստը տեղի է ունենալու հունվարի 13-ին։
Նա հավելեց, որ խորհրդի նիստին կքննարկվի բոլոր այն պատգամավորների անունները, որոնք այս ընթացքում գերազանցել են թույլատրելի բացակայությունների թիվը։
Հիշեցնենք` 2022թ.–ի ապրիլից ԱԺ ընդդիմադիր խմբակցությունները բոյկոտել էին խորհրդարանի նիստերը։ Տևական ժամանակ նրանք բողոքի ակցիաներ էին անում` պահանջելով վարչապետ Նիկոլ Փաշինյանի հրաժարականը։Հոկտեմբերի 25–ից նրանք կրկին մասնակցում են ԱԺ նիստերին։