ԵՐԵՎԱՆ, 10 հունվարի – Sputnik. Իրանի խորհրդարանի նախագահ Մոհամադ Բաղեր Ղալիբաֆը հայտարարել էր, որ Իրանը կովկասյան տարածաշրջանում սահմանների փոփոխություն չի ընդունի։ Նա նման հայտարարությամբ հանդես է եկել Ադրբեջանի խորհրդարանի նախագահ Սահիբա Գաֆարովայի և Թուրքիայի խորհրդարանի նախագահ Մուստաֆա Շենթոփի հետ հունվարի 9-ին կայացած հանդիպման ժամանակ է, տեղեկանում ենք IRNA-ից։
«Մենք կարող ենք լավ հարաբերություններ ունենալ միմյանց հետ տարածաշրջանային և գլոբալ ասպարեզում, և որքան մտերիմ են տարածաշրջանի երկրները, այնքան լավ՝ տարածաշրջանի համար։ Չի կարելի թույլ տալ ոչ տարածաշրջանի երկրներին միջամտել այս հարցում»,–ընդգծել է Ղալիբաֆը:
Նա հավելել է` Իրանը կովկասյան տարածաշրջանում չի ընդունում սահմանների աշխարհաքաղաքական որևէ փոփոխություն։
Նշենք, որ իրանցի պաշտոնյաները, այդ թվում՝ գերագույն առաջնորդ Ալի Խամենեին, բազմիցս ասել են, որ դեմ են տարածաշրջանում սահմանների որևէ փոփոխության՝ նկատի ունենալով փաստացի ադրբեջանական ոտնձգությունները Հայաստանի Սյունիքի մարզի նկատմամբ և այսպես կոչված «Զանգեզուրի միջանցքի» մասին հայտարարությունները, որը ենթադրում է արտատարածքային միջանցք դեպի Նախիջևան և Թուրքիա Հայաստանի տարածքով։