ԵՐԵՎԱՆ, 10 հունվարի – Sputnik. 2022թ–ի տնտեսական աճի տվյալները դեռ հրապարակված չեն, բայց 12.5- 13 տոկոս աճ է ակնկալվում։ Այս մասին այօր հրավիրված ասուլիսի ժամանակ հայտարարեց ՀՀ վարչապետ Նիկոլ Փաշինյանը։
Նա նաև նշեց, որ նման աճ ապահովվել է այդ թվում ՌԴ–ից Հայաստան տեղափոխված քաղաքացիների շնորհիվ` միաժամանակ, սակայն, արձանագրելով, որ ռելոկանտներին ընդունած ոչ բոլոր երկրներին է հաջողվել 12-13 տոկոս տնտեսական աճ ապահովել։
«Մենք 2022թ–ի համար, մինչև ձեզ հայտնի իրադարձությունները, նախատեսել էինք 7 տոկոս տնտեսական աճ։ Բայց, փաստորեն, շատ ավելին է ստացվել, ինչի համար ուրախ եմ»,– ասաց նա։
Նա նաև հույս հայտնեց, որ հաջորդ տարվա համար ևս դրական դինամիկան կպահպանվի ու բյուջեով նախատեսված 7 տոկոս աճն առնվազն հնարավոր կլինի ապահովել։
«Երևան քաղաքում ու հանրապետությունում այսօր շինարարական բում է, բայց շատ կարևոր է, որ այդ տնտեսական աճը միայն շինարարության հաշվին չէ։ Տնտեսական աճը ծառայությունների, արդյունաբերության, էներգետիկ շուկայի ազատականացման հաշվին է, որոնք շատ լուրջ խորքային, ինստիտուցիոնալ բարեփոխումներ են, և իրենք իրենցով արդեն ապահովում են շատ լուրջ տնտեսական դինամիկա։ Եվ բոլոր հիմքերը կան կարծելու, համոզված լինելու, որ մենք 2023թ–ին նույնպես առնվազն 7 տոկոս տնտեսական աճ կապահովենք»,– ասաց նա։
Վարչապետը շեշտեց, որ այդ աճը դրական ազդեցություն կունենա նաև անվտանգության ապահովման համար։