ԵՐԵՎԱՆ, 10 հունվարի – Sputnik. Ադրբեջանի ԶՈւ–ն ՀՀ ինքնիշխան տարածքում է ոչ թե 1.5 տարի, այլ 30։ Այսօր հրավիրված ասուլիսի ժամանակ այսպիսի հայտարարություն արեց ՀՀ վարչապետ Նիկոլ Փաշինյանը։
«Ադրբեջանի ԶՈւ–ն 90-ականների սկզբից ավելի քան 70 կմ2 տարածք են օկուպացրել ՀՀ–ից, մասնավորապես` Տավուշի մարզում, Արարատի մարզում ու այդպես շարունակ»,– ասաց Փաշինյանը։
Իսկ 2021թ–ի մայիսից, ըստ վարչապետի, Արդրբեջանը ՀՀ–ից օկուպացրել է նոր տարածքներ։ Հայաստանի դիրքորոշումը, նրա խոսքով, այն է, որ Ադրբեջանի ԶՈւ–ն պետք է դուրս գա այդ տարածքներից, և այս նպատակին հասնելու համար Հայաստանը պետք է օգտագործի բոլոր դիվանագիտական միջոցները։
«Մեզ համար կարևոր է նաև, որ մենք նոր սադրանքի պատճառ չդառնանք, ու մեր գործողությունները բխում են սրանից»,– ասաց նա։
Հիշեցնենք` 2022–ի նոյեմբերի 16–ին Ազգային ժողովում կառավարության հետ հարցուպատասխանի ժամանակ ՀՀ վարչապետ Նիկոլ Փաշինյանը հայտարարեց, որ 1991 թվականից Տավուշի մարզի Բերքաբեր, Պառավաքար գյուղի վարելահողերի մոտ 70 տոկոսը օկուպացված է, օկուպացված են նաև Վազաշեն և Այգեհովիտ գյուղերի վարելահողերը։