Թուրքական մոդուլային բազա Արարատի ստորոտում. ովքե՞ր են լինելու թիրախում

Արարատ լեռան վրա Թուրքիայի կողմից մոդուլային բազա կառուցելու նպատակը քրդական ուժերի պարտիզանական ջոկատների դեմ պայքարն է: Sputnik Արմենիայի հետ զրույցում նման կարծիք հայտնեց ռազմական փորձագետ Նարեկ Ներսիսյանը` մեկնաբանելով Արարատ լեռան ստորոտում Թուրքիայի կողմից մոդուլային բազա տեղակայելու լուրերը։

Ավելի վաղ ԶԼՄ-ներում տեղեկություն էր շրջանառվում, որ ռազմակայանը գտնվում է Հայաստանի հետ սահմանին, սակայն աշխարհագրական առումով բազան Մեծ և Փոքր Արարատների հակառակ կողմում (Հայաստանի տեսանկյունից)։ Այն շատ ավելի մոտ է Իրանի հետ սահմանին (8 կմ-ից պակաս), քան հայկական սահմանին (մոտ 35 կմ)։

Բազան Գյունգորեն գյուղից մոտ 2100 մետր բարձրության վրա է։ Թուրք պաշտոնյաների փոխանցմամբ ՝ այն ստեղծվում է «ահաբեկչության դեմ պայքարի» համար։ Այդ իսկ պատճառով նրա պատրաստվածության մակարդակը ստուգել են տեղի ժանդարմերիայի և ոստիկանության պետերը։

Նկատենք, որ այդ շրջանը հայտնի է որպես թուրքական ուժայինների և քրդական ջոկատների, մասնավորապես, Քուրդիստանի աշխատավորական կուսակցության անդամների միջև մշտական բախումների թատերաբեմ։

Բացի այդ, նման և այլ հենակետ տեղադրելու պրակտիկան թուրքական իշխանությունները կիրառում են նաև այլ քրդաբնակ շրջաններում, որտեղ ակտիվ է Քրդստանի աշխատավորական կուսակցությունը։

Ինչպես նշում է փորձագետը, Արարատ լեռան հարակից շրջաններում ահաբեկչության ռսիկեր կան, և մոդուլային բազայի կառուցաման նպատակն այդ ռիսկերը չեզոքացնելն է։

Իսկ ընդհանուր առմամբ նման բազաները, Ներսիսյանի խոսքով, նորություն չեն, դրանք լայնորեն տարածված են արևմտյան բանակային համակարգերում։

Դրանք շատ նման են հիմնական զորամասերին, միակ տարբերությունն այն է, որ կարող են մարտական պայմաններում դիրքային փոփոխություններ կատարել և նոր վայրում արագ տեղակայվել։

Նշենք, որ 2022 թվականի գարնանը Թուրքիան երկրի հարավ-արևելքում (այդ թվում ՝ Արարատի շրջանում) քուրդ պարտիզանների դեմ պայքարի գործողություններից մեկի ժամանակ ներգրավել է մի քանի հարյուր ոստիկանների և ժանդարմների։