ԵՐԵՎԱՆ, 5 հունվարի - Sputnik. Ականազերծմամբ զբաղվող HALO Trust միջազգային ոչ կառավարական կազմակերպությունը Twitter-ի իր էջում հանդես է եկել հայտարարությամբ ՝ կապված Լաչինի միջանցքի շրջափակման հետ:
Կազմակերպությունը լրջորեն մտահոգված է միջանցքի շարունակական շրջափակմամբ, որը միակ մուտքն է ապահովում Լեռնային Ղարաբաղ։
Շրջափակումից գրեթե մեկ ամիս անց կազմակերպությունը ուշադիր հետևում է դրա հումանիտար հետևանքներին։ HALO Trust-ի շուրջ 100 աշխատակիցներ Լեռնային Ղարաբաղում են, և կազմակերպությունը հետևում է նրանց համար ապրանքների և այլ ապրանքների հասանելիությանը։
«HALO Trust-ը հույս ունի արագ լուծել խնդիրը և մշտական կապի մեջ է գործընկերների և այլ մարդասիրական կազմակերպությունների հետ ՝ անհրաժեշտության դեպքում մարդասիրական օգնությունը համակարգելու համար»,-նշված է հաղորդագրության մեջ:
HALO Trust-ը բարեգործական ոչ առևտրային կազմակերպություն է, որը զբաղվում է ականների և չպայթած զինամթերքի վնասազերծմամբ, որոնք կարող են վտանգ ներկայացնել քաղաքացիական անձանց համար: Այն ունի ավելի քան 7000 սակրավորներ Լեռնային Ղարաբաղում, Կամբոջայում, Մոզամբիկում, Սոմալիում, Շրի Լանկայում, Էրիթրեայում, Աբխազիայում, Չեչնիայում, Կոսովոյում, Անգոլայում և Աֆղանստանում: Կազմակերպությունը Արցախում ականազերծման աշխատանքները սկսել է 2000 թվականից։
Հիշեցնենք` դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Դեկտեմբերի 16–ի առավոտյան Արցախի պետնախարար Ռուբեն Վարդանյանը հայտնեց, որ Արցախում գազամատակարարումը վերականգնվել է, և դա արվել է առանց որևէ նախապայմանի։
Լաչինի միջանցքը, սակայն, շարունակում է փակ մնալ։