ԵՐԵՎԱՆ, 5 հունվարի – Sputnik. 2023թ–ի փետրվարի 1-ից ՀՀ էլեկտրաէներգետիկ շուկայի շուրջ 20 տոկոսը (1,2 մլրդ ԿՎտ/ժամ) կգործի ազատ շուկայական կանոններով։ ՀՀ կառավարության այսօրվա նիստում հայտնեց ՀՀ հանրային ծառայությունները կարգավորող հանձնաժողովի նախագահ Գարեգին Բաղրամյանը` ներկայացնելով 2018թ–ից Հայաստանում մեկնարկած էլեկտրաէներգետիկ շուկայի ազատականացման վերջին արդյունքները։
«Հիմնական սեգմենտը մենաշնորհից մրցակցության անցումն է։ Առաջին հերթին սպառողին հնարավորություն է տրվելու ինքնուրույն ընտրելու իր մատակարարին։ Այսինքն` սպառողը հնարավորություն կունենա ընտրելու մատակարար, որը պայմանագրային հիմունքներով իրեն էլեկտրաէներգիա կմատակարարի։ Կոմերցիոն սպառողների դեպքում հնարավորություն է ստեղծվել նույնիսկ ինքնուրույն հանդես գալ շուկայի մեծածախ սեգմենտում ու անմիջապես արտադրողից էլեկտրաէներգիա գնել։ Մյուս հնարավորությունն է` մնալ ՀԷՑ–ի սպառող կարգավորվող գներով»,– ասաց Բաղրամյանը։
ՀԾԿՀ նախագահը նշեց, որ Հայաստանից դեպի Իրան և Վրաստան էլեկտրահաղորդման գծերի թողունակության ավելացման և ԵԱՏՄ ընդհանուր էներգետիկ շուկայի գործարկման արդյունքում ՀՀ էլեկտրաէներգիա արտադրող ընկերությունների համար լայն հնարավորություններ կստեղծվեն նաև անդրսահմանային առևտրի համար։
«Արդեն ունենք ստացած 12 մատակարարման լիցենզիա, որոնք ունեն իրենց սպառողներն ու այլևս կարգավորվող սակագներով չեն, սպառողներին էլեկտրաէներգիա են մատակարարում պայմանագրային գներով։ Ունենք 12 մեծածախ առևտրի լիցենզիա, սա ևս մի բարեփոխման հետևանք է, որ ընդհանուր շուկայի շրջանակում Հայաստան էլեկտրաէներգիայի արտահանումն ու ներկրումն այլևս չի լիցենզավորվում, և դրա արդյունքում էապես ավելացել է արտահանումը։ Այդ մեծածախ առևտրի լիցենզիա ունեցող ընկերությունները ինքնաբերաբար էլեկտրաէներգիա արտահանելու և ներկրելու իրավունք են ստանում»,– ասաց Բաղրամյանը։
Ազատականացման ծրագրով նախատեսված ժամանակացույցի համաձայն` 2023թ–ից ազատական շուկային պետք է միանան ՀՀ խոշոր սպառողները, 35 ԿՎտ/ժամ լարման հոսանք սպառողները` 2024թ–ից, իսկ 6-10 35 ԿՎտ/ժամ հոսանք սպառողները` 2025թ–ից։ Ժամանակացույցը, սակայն, կարող են խախտել բոլոր այն սպառողները, որոնք կցանկանան ազատականացված համակարգին միանալ սահմանված ժամկետից ավելի շուտ։