ԵՐԵՎԱՆ, 4 հունվարի – Sputnik. Հունվարի 1-ին ուկրաինական զորքի հասցված հարվածի հետևանքով Մակեևկայում զոհված ՌԴ զինվորականների թիվը հասել է 89-ի։ Այս մասին հայտնել է ՌԴ ԶՈՒ գլխավոր ռազմաքաղաքական վարչության առաջին տեղակալ, գեներալ–լեյտենանտ Սերգեյ Սևրյուկովը։
Մակեևկա բնակավայրի շրջանում ՌԴ զինծառայողների ժամանակավոր տեղակայման կետին հարվածը հասցվել էր HIMARS համազարկային կրակի ռեակտիվ 6 արկով։ Ռեակտիվ երկու արկ որսացել էին ՀՕՊ հերթապահ միջոցները։ 4 արկ ընկել էր ՌԴ զինծառայողների տեղակայման շենքի վրա։
Արկի պայթյունից փլուզվել է շենքի ծածկը։
«Ողբերգությունից անմիջապես հետո զորամասի հրամանատարությունն ու սպաները, կրտսեր հրամանատարական անձնակազմն ու այլ ստորաբաժանումների զինծառայողները հնարավոր միջոցներ են ձեռնարկել տուժածներին փրկելու համար։ Առաջին բուժօգնություն է ցուցաբերվել, վիրավորները տարհանվել են բուժհաստատություններ», – ասել է գեներալը։
Նա նշել է, որ տուժածներին և զոհվածների ընտանիքներին անհրաժեշտ աջակցություն է ցուցաբերվում։
Պատասխան կրակով ոչնչացվել է Մակեևկային ՈւԶՈւ–ի կողմից համազարկային կրակի ռեակտիվ համակարգով հարված հասցրած արձակիչ կայանը։ Բացի այդ, ԴԺՀ–ի Դրուժկովկա երկաթուղային կայարանի շրջանում խոցվել է HIMARS–ի ևս 4 արձակման կայան, RM-70 Vampire ՀԿՌՀ–ի 4 մարտական մեքենա, ավելի քան 800 ռեակտիվ արկ։ Իսկ Մասլյակովկայի շրջանում (Կրամատորսկ) ոչնչացվել է «օտարերկրյա լեգիոնի» ստորաբաժանման ժամանակավոր տեղակայման կետ։
Ներկայում Մակեևկայի դեպքերի հանգամանքները հետաքննող հանձնաժողով է աշխատում։ Սակայն, Սևրյուկովի խոսքով, տեղի ունեցածի հիմնական պատճառը, հակառակ արգելքի, անձնակազմի կողմից հեռախոսների միացումն ու զանգվածային կիրառումն էր։ Դա թույլ է տվել հակառակորդին պարզել ՌԴ զինծառայողների գտնվելու կոորդինատներն ու հրթիռային հարված հասցնել։
Ներկա պահին միջոցներ են ձեռնարկվում հետագայում նման ողբերգական դեպքերը բացառելու ուղղությամբ։ Հետաքննությունից հետո մեղավոր պաշտոնյաները պատասխանատվության կենթարկվեն։
Հիշեցնենք՝ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 313-րդ օրը։