Վերջին 2-3 շաբաթվա ընթացքում պաշտոնական Երևանն իրականացնում է ընդգծված հակառուսական տրամադրությունների գեներացիա Հայաստանում` սկսած պաշտոնական խողովակներից, վերջացրած իր հետ առնչություն ունեցող հանրային շրջանակներով։ Sputnik Արմենիայի հետ զրույցում նման կարծիք հայտնեց քաղաքական վերլուծաբան Վահե Հովհաննիսյանը` հենց այդ համատեքստում դիտարկելով ՀՀ ԱԳՆ հայտարարության մեջ առկա հակասական տեղեկատվությունը։
ՀՀ ԱԳՆ–ն հունվարի 3-ի հայտարարության մեջ մասնավորապես նշել է. «Մենք մեծապես գնահատում ենք ՄԱԿ–ի ԱԽ անդամների գերակշիռ մեծամասնության կողմից հանրայնորեն արտահայտված ու հստակ կոչերը` Ադրբեջանի կողմից Լաչինի միջանցքի շրջափակումը վերացնելու և միջազգային կառույցների՝ Լեռնային Ղարաբաղ մուտք ապահովելու վերաբերյալ։ Ողջունում ենք նաև ԱԽ հիշյալ նիստին հաջորդած տասնօրյա ժամանակահատվածում Ֆրանսիայի ջանքերը՝ իրավիճակի վերաբերյալ ԱԽ նախագահողի մամուլի հայտարարություն ընդունելու ուղղությամբ»։
Մինչդեռ ՄԱԿ-ում ՌԴ ներկայացուցչի առաջին տեղակալ Դմիտրի Պոլյանսկին հայտարարել է, որ ՄԱԿ-ի Անվտանգության խորհրդի հայտարարությունը Լաչինի միջանցքի շուրջ ստեղծված իրավիճակի վերաբերյալ մամուլի համար չի ընդունվել Ֆրանսիայի մոտեցման պատճառով, քանի որ ֆրանսիացիներն անտեսել են ռուսական կողմի առաջարկների ճնշող մեծամասնությունը։
«Հայաստանում հակառուսական տրամադրությունների գեներացումն անհանգստացնում է շատերին։ Պաշտոնական Երևանի քայլերին ցավոք չի արձագանքում պաշտոնական ընդդիմությունը, ինչը նույնպես նոնսենս է։ Կա իշխանություն, որը բոլոր ձևերով տանում է հակառուսական գիծ, սակայն չկա այլընտրանքը` այն քաղաքական ինստիտուտը, որը հանդես կգա այլ տեսակետներով, հետևաբար մեր հասարակությունն ուղիղ ընկնում է այդ տրամադրությունների տակ»,– նշեց Հովհաննիսյանը։
Նրա կարծիքով` հանրային լայն շրջանակներում աշխատում է այն գաղափարը, թե ֆրանսիացիներն ինչ–որ բան անում են, իսկ ռուսները` խանգարում։ Քաղաքական վերլուծաբանն ընդգծեց, որ իրականությունն ու քաղաքական լուծումներն այլ տեղում են, բայցև նշեց, որ կա հանրային գործընթաց, կան այլևս չկառավարվող հանրային տրամադրություններ, ինչն ըստ էության անհանգստացնող իրողություն է։
«Որպեսզի հանրությունն ունենա կշռադատելու և ընտրություն կատարելու իրավունք, պետք է լինեն հակադիր տեսակետներ։ Մեզ մոտ կա իշխանություն, և չկա այլընտրանքային դաշտ, ինչը շատ ավելի վտանգավոր է, որովհետև այդ բացակա դաշտի պայմաններում հանրությանը շատ դեպքերում չի ներկայացվում իրականությունը, այսինքն` հարցերին, բացի պաշտոնական տեսակետից, այլ կերպ նայելու հնարավորությունը»,– ասաց մեր զրուցակիցը։
Հովհաննիսյանի դիտարկմամբ` Հայաստանում հսկայական և գրագետ աշխատանք պետք է կատարի նաև ռուսական կողմը, որովհետև հենց այդ կողմի գործունեության թերացումները հայ հասարակության հետ իրականացվող աշխատանքներում նպաստում են վերջին շրջանում հակառուսական տրամադրությունների աճին։