ԵՐԵՎԱՆ, 2 հունվարի – Sputnik. Թուրքիայի ազգային պաշտպանության նախարար Հուլուսի Աքարը հայտարարել է, որ Աթենքն Անկարայի հետ հակասությունները փորձում է ներկայացնել որպես Թուրքիայի և ՆԱՏՕ-ի ու Միացյալ Նահանգների միջև խնդիրներ։
Ավելի վաղ Թուրքիայի արտգործնախարար Մևլութ Չավուշօղլուն անմիջական սպառնալիքներ էր հնչեցրել Հունաստանի հասցեին և զգուշացրել Աթենքին, որ Էգեյան ծովում չընդլայնի իր տարածքը։ Չավուշօղլուն ասել էր, թե հունական մամուլը գրում է, որ Հունաստանի տարածքային ջրերը Կրետեի շուրջ կընդլայնվեն մինչև 12 մղոն, սակայն Թուրքիան թույլ չի տա, որ Էգեյան ծովում Հունաստանի ջրերն ընդլայնվեն նույնիսկ 1 մղոն։ Ավելի վաղ Թուրքիան հայտարարել էր, որ պատերազմի համար առիթ է համարելու Հունաստանի ջրերի ընդլայնումը։
Հիշեցնելով, որ Թուրքիայի և Հունաստանի միջև ժամանակ առ ժամանակ խորհրդատվական հանդիպումներ են տեղի ունեցել ՆԱՏՕ–ի հետ կապված ընթացակարգերի և վստահության միջոցների վերաբերյալ` Աքարն ասել է, որ Հունաստանն այդ հանդիպումները չի անցկացնում, այլ փորձում է կանխել դրանք։ Նրա ասածը մեջբերում է «TRT Haber» հեռուստաալիքը։
Նշելով, որ Հունաստանը փորձում է Թուրքիայի հետ իր խնդիրները ներկայացնել որպես ՆԱՏՕ–ի, ԱՄՆ–ի և ԵՄ–ի հետ Թուրքիայի խնդիրներ` Աքարն ավելացրել է, որ այժմ բոլորը հասկացել են Հունաստանի հնարքները։
«Մենք ակնկալում ենք, որ այդ առումով ամեն ինչ ավելի զգուշավոր կլինի։ Հունաստանում այժմ շատ են սկանդալները։ Գաղտնալսման, ներգաղթյալների, կոռուպցիայի հետ կապված սկանդալներ։ Բացի այդ, Հունաստանն անհաջողություններ ունի Միջերկրական ծովի արևելյան հատվածում, անհաջողություններ, որոնք գիտակցում է հույն հանրությունը։ Այդ ամենը կոծկելու համար նրանք հույս ունեն ուժեղացնել Թուրքիայի հետ հարաբերություններում առկա լարվածությունը», – ասել է նա։
Թուրքիային սպառնալիք անվանած որոշ հույն քաղաքական գործիչների հայտարարություններին արձագանքելով` Աքարն ասել է, որ Թուրքիան որևէ մեկին չի սպառնում։
«Թուրքիան հուսալի, ուժեղ, արդյունավետ դաշնակից է... Թուրքիան որևէ մեկին չի սպառնում։ Դա պետք է կրկին ու կրկին հասցնել նրանց ուղեղներին, նրանք պետք է հասկանան», – ընդգծել է թուրք նախարարը։
Հիշեցնենք` 1995 թվականին, երբ Հունաստանի խորհրդարանը վավերացրեց UNCLOS կոնվենցիան, Անկարան հայտարարեց` եթե Հունաստանն իր տարածքային ջրերը Էգեյան ծովում 6 ծովային մղոնից հասցնի 12–ի, ապա դա կհամարվի Թուրքիայի ազգային ինքնիշխանության խախտում և կվերածվի casus belli–ի`պատերազմ հայտարարելու պատճառի։
Հունաստանի և Թուրքիայի հարաբերությունները վերջին տարիներին լրջորեն վատթարացել են տարածքային վեճերի պատճառով։ Երկու երկրները չեն կարողանում պայմանավորվել ծովային գոտիների շուրջ։